ORANJESTAD – Diabierna mainta Minister di Cultura sra. Xiomara Maduro tabata presente na Biblioteca Nacional na Oranjestad pa haci apertura di e training “Educa cu Cultura”, cual e team di Departamento di Cultura cu sosten di Ministerio di Cultura a organisa e training aki specialmente pa empleadonan publico y Organisacionnan No-Gubernamental (ONG) cu ta traha riba tereno di cultura. Nan mester tin conocemento di conceptonan y terminologia relaciona cu cultura.
Por ehempel ‘cultura’. Con ta defini cultura?
Ora ta trata di maneho di cultura, ta e definicion di UNESCO, e 193 paisnan miembro di UNESCO ta aplica: “Cultura ta encera un cantidad di aspecto spiritual, material, intelectual y emocional cu ta caracterisa un sociedad of un grupo social. Incluyendo no solamente arte y literatura, sino tambe forma di biba, derechonan fundamental di e ser humano, sistemanan di balor, tradicion y creencia”. Por comprimi e definicion aki den tres palabra. Cultura ta nifica simplemente: forma di biba!
Otro conceptonan cu ta haya atencion ta maneho integral di cultura y papel di cultura den desaroyo duradero. Ora ta papia di un maneho integral di cultura ta referi na e areanan di cultura cu ta relaciona y complementa cu otro. Tambe e ta ensera cu organisacionnan y actornan cultural ta traha cu otro sectornan di comunidad y organisacionnan local y internacional. Cultura tin un papel clave den desaroyo duradero di un pais. Cultura ta instrumental pa economia, bida social, bienestar general y medio ambiente di un pais.
E mandatario a trece dilanti cu su mes persona a participa caba na e training aki , cu ya a wordo duna na empleadonan di Ministerio di Cultura, Departamento Cultura Aruba (DCA) y Museo Archeologico.
Ministerio di Cultura a prepara algun profesional riba tereno di cultura pa nan tambe por duna e training aki. Cu e training di awe pa e departamentonan publico y Organisacionnan No-Gubernamental (ONG) cu ta traha riba tereno di cultura, e meta ta wordo alcansa pa esnan activo riba tereno cultural y pueblo di Aruba ta na altura di kico basicamente cultura ta come y bebe. Ta cuminsa di chikito pasobra cosnan grandi ta cuminsa di chikito y cu cada paso ta yudabo yega na e direccion cu nos pais kier bay. Den nos economia tin potencial, cultura tin un rol escencial, manera industria creativo, e industria oraño. Departamento di Cultura a mustra iniciativa pasobra ta nan ta e catalisador, esun cu mester yuda pusha pa nos yega y esaki ta depende di cada uno di nos di e tereno cultural con nos ta mira pa futuro y con liher cada uno ta duna di su banda pa asina yega na un maneho integral di cultura pa nos pais.
Un danki na tur esnan cu a participa y contribui pa por a logra e training aki Departamento di Cultura, Unesco, Unoca y Biblioteca Nacional.
Minister Xiomara Maduro na final a trece dilanti cu nos como pais nos mester percura pa biba nos cultura y pa esaki keda pa semper mescos cu e sanger cu ta core den nos benanan pa duna nos oxigeno pa nos sigui biba.
