Den un Cas di Cultura completamente yen cu fanaticonan grandi y chikito
Diabierna cu a pasa, Minister Xiomara Maduro di Cultura, den nomber di Gobierno di Aruba, un duna un reconocemento na Janiro ‘Ataniro’ Eisden en conexion cu su 30 añanan den farandula.
Tabata un anochi unico cu a hiba tur esnan presente bek den tempo. E anochi a cuminsa cu un documentario cu a conta di con Janiro a cuminsa y tambe a ilustra tur esnan cu a contribui na formacion di e artista cu e ta awe. Despues a sigui cu Popcorn Dancers cu a baila riba diferente cantica di Janiro, sigui pa un sketch di Gang di Arte. Entre e presentacion nan aki, minister Maduro a tuma un momento pa subi e tarima di Cas di Cultura pa asina entrega un reconocemento na Janiro Eisden cu tin 30 aña den farandula, cantando canticanan den nos dushi idioma di Papiamento. Minister Maduro a elogia ‘Ataniro’ pa su forma di rima, di canta pero tambe pa su contribucion valioso na nos lenga materno. E anochi a finalisa cu un concierto di ‘Ataniro’ caminda cu el’a presenta su canticanan di mas conoci, dunando e publico nostalgia di canticanan cu tabata hit durante ultimo 30 aña.
Minister Maduro ta gradici Departamento di Cultura y tur esnan cu a contribui na e anochi aki y cu a haci’e uno unico yena cu creatividad, pero mas importante, dunando honor na un artista cu sin duda tin un aporte grandi na e arte di musica cu ta parti di nos cultura.
