Dialuna merdia, Minister di Defensa di Hulanda Ruben Brekelmans, hunto cu un delegacion di Defensa Hulandes, a haci un bishita di trabao cerca Prome Minister Mike Eman.
Durante e reunion, a dialoga riba e rol importante di Reino Hulandes, particularmente riba e proteccion di e integridad teritorial di nos islanan cu ta garantisa bao Reino pero tambe riba e responsabilidad di Ministerio di Defensa Hulandes. Prome Minister a subraya e rol di e Minister di Defensa Brekelmans cu semper ta presente activamente pa medio di contacto directo of a traves di otro personanan crucial den defensa. Durante e ultimo dianan, tabatin momentonan dificil cu e situacion na Venezuela, y e capa di proteccion cu Reino Hulandes ta brinda, ta duna un sentido di trankilidad y siguridad riba e islanan den Caribe.
Prome Minister a expresa su gratitud na Minister Brekelmans pa e contacto habri y continuo relaciona cu e situacion na Venezuela y kico lo por a spera. Pa awo, e situacion ta mas trankil den region y no tin motibo pa preocupacion.
Minister Brekelmans di su parti a gradici Prome Minister pa e reunion den cual e por a comparti cu tabatin contacto estrecho entre Hulanda y Aruba pa cu e situacion cu a surgi dia 3 di januari y ta subraya cu e situacion a stabilisa y cu a reanuda buelonan comercial den area y cu tur cos ta mas trankil. Defensa Hulandes tin bista riba e situacion y ta indica cu no tin menasa pa cu e islanan y a sigura cu si esaki cambia, lo informa Aruba y percura pa duna sosten si mester.
Na final, Prome Minister Eman a expresa su gratitud na Premier Schoof, cu desde momentonan di marduga di e accion militar na Venezuela, a tuma contacto cu Prome Minister Eman pa expresa su solidaridad, cual ta duna un sentido di trankilidad aun mas.
