Ministerio di Deporte ta informa cu ayeramainta a tuma luga e inicio oficial di construccion di e proyecto “FIFA Mini Arena Turf” na cancha di S.V. Unistars Pos Chikito. E momento simbolico aki a marca un paso importante den e esfuerso continuo pa fortalece infrastructura deportivo na Aruba y pa crea mas espacionan accesibel pa nos comunidad, especialmente pa nos muchanan y hobennan.
Minister di Deporte, mr. Gerlien Croes, a confirma e comienso di e construccion den presencia di representantenan di e sector deportivo, incluyendo e federacion nacional di futbol (AVB), Lotto pa Deporte y partnernan cu ta contribui activamente na realisacion di e proyecto.
E “FIFA Mini Arena Turf Project” ta forma parti di un programa internacional di FIFA, cu ta enfoca riba crea canchanan chikito di futbol den comunidadnan rond mundo. E iniciativa aki ta pone enfasis riba acceso, inclusividad y desaroyo di talento, pa asina duna mas oportunidad pa participacion y crecemento deportivo, den un ambiente sigur y moderno.
Minister Gerlien Croes ta subraya cu e proyecto aki ta un ehempel di con colaboracion entre institucionnan deportivo y partnernan por produci resultadonan concreto. E Minister ta expresa su orguyo cu Aruba a logra realisa e oportunidad aki y cu e proyecto ta wordo implementa den un comunidad cu tin hopi potencial y amor pa futbol.
Segun e planificacion, dentro di aproximadamente seis siman, Aruba lo por conta cu su prome FIFA Mini Arena Turf operacional. Ademas, e intencion ta pa sigui cu preparacion di proyectonan similar pa implementacion den otro barionan, cu e mesun meta: crea mas oportunidad pa deporte, movecion y desaroyo comunitario.
Minister Gerlien Croes ta gradici tur stakeholders cu a aporta pa e logro aki, y ta mira cu entusiasmo pa e proximo fase: e apertura oficial di e mini arena, caminda e comunidad di Pos Chikito lo por celebra un proyecto cu ta pone hubentud y deporte na centro di desaroyo.
Ministerio di Deporte ta reafirma su compromiso pa sigui inverti den infrastructura y oportunidadnan deportivo, y pa sigui traha hunto cu tur partnernan pa progreso di deporte na Aruba.
