Diasabra ultimo, Aruba a vibra cu energia, deporte y alegria durante e celebracion di e IBiSA Kids Run 2025, organisa pa IBiSA den marco di Olympic Day Celebration. Cu mas di 700 participante for di mas cu 60 scol, muchanan entre 4 y 18 aña a participa den e careda mas grandi di mucha na Aruba.
E evento, cu ta un colaboracion anual entre IBiSA, Comite Olimpico Arubano (COA) y Aruba Bank, ta representa un momento di union y inspiracion pa promove movemento, salud y spirito deportivo entre e generacion nobo. E demanda pa participa a keda hopi grandi, demostrando cu e amor pa deporte ta sigui crece den nos comunidad y bou di nos muchanan.
Aunke cu e ‘Olympic Day’ oficial ta dia 23 di juni, e celebracion a tuma luga diasabra den combinacion y forma di celebracion cu e IBiSA Kids Run. E ambiente tabata festivo y educativo na mes momento: muchanan por a saca potret cu e antorcha olimpico den un photobooth special, a ricibi nan certificado di participacion na oficina di COA, a participa den un experencia deportivo, conoce diferente federacionnan di deporte y wak demostracionnan bibo durante e mainta aki.
Minister Gerlien Croes, como Minister di Educacion, Hubentud y Deporte, ta expresa su felicitacion y orguyo na e organisadornan:
“Pabien y danki IBiSA, Comite Olimpico Arubano y Aruba Bank pa un evento cu ta mas cu deporte—ta representa union, crecemento y inspiracion. PABIEN! ta bay na tur mucha cu a participa, y pa cada maestro, mayor y guia cu a duna nan motivacion pa participa y triunfa”.
Esaki ta deporte den su forma mas puro: inclusion, diberticion y formacion. Nos ta conta riba nos mucha- y hobennan, y e pasonan cu nan ta tuma awe ta fundeshi pa un Aruba mas saludabel y mas participativo.
