Den un ambiente yena di orguyo y felicidad, mas di 50 cursista a completa cu exito e curso di Supervisor Management 1 y 2, ofreci door di e programa di Enseñansa pa Empleo. Un iniciativa educativo cu ta crea un brug real entre enseñansa y oportunidad den e mundo laboral.
Durante e ceremonia di graduacion, Minister di Relacionnan den Reino, Educacion, Hubentud, Innovacion y Deporte, mr. Gerlien Croes, tabata presente pa entrega personalmente e certificado di logro na e cursistanan memey di nan famia, director, docente y personal di Enseñansa pa Empleo. E minister a expresa su gran orguyo den un discurso motivacional unda e a enfatisa e importancia di formacion personal y profesional continuo.
E curso di Supervisor Management 1 y 2 ta desaroya pa fortalece e capacidadnan di liderazgo, maneho di personal y operacion, y prepara cursistanan pa un rol mas fuerte y efectivo den su trabou. Esaki ta fundamental pa un Aruba cu ta pone enfasis riba formacion continuo y desaroyo humano como base pa progreso duradero.
Minister Gerlien Croes a felicita tur cursista pa nan dedicacion, persistencia y deseo di superacion. “Pabien di curason! Sigui crece, sigui siña, y sigui inspira otro cu bo ehempel. Aruba mester di hende manera boso pa sigui hiba nos pais dilanti”.
E ministerio ta compromete pa sigui inverti den programanan cu ta habri portanan pa yiu, adulto y profesionalnan cu ta busca un caminda nobo den nan bida. Enseñansa pa Empleo ta prueba cu siñamento nunca ta caba — y cu e boluntad pa sigui crece por bira e motor di transformacion.
