ORANJESTAD – Dialuna atardi Minister di Enseñansa y Deporte sr. Endy Croes tabata presente na Joe Laveist Ballpark na San Nicolas pa e gran apertura oficial di e prome edicion di Baseball in Paradise.
Un Joe Laveist sport park yena cu alergria di publico presente, energia positivo y entusiasmo deportivo.
Un campeonato di baseball na unda cu un total di 28 ekipo, 450 hoben entre edad di 12 y 18 aña ta bataya cu otro di 4 di october pa 9 di october pa logra e titulo maximo. E paisnan invita pa participa den e campeonato ta Bonaire, Curaçao, Hulanda y Aruba. “Pa mi tabata un honor di por a lansa e prome bala y asina oficialmente habri e campeonato di Baseball in Paradise”, e Mandatario a expresa.
Minister di Enseñansa y Deporte sr. Endy Croes a desea organisadornan, ekipo di Aruba y paisnan participando hopi exito alabes a gradici pa e invitacion aki ricibi.
Minister a expresa cu Deporte ta un vehiculo cu ta conduci nos riba e bon caminda den bida. Palabranan di elogio y gratitude sigur ta bai pa Future Star Baseball Academy y Shurty Tremus pa organisa un bunita Campeonato aki pa nos hobennan.
