Bunita proyecto cu ta duna nos muchanan oportunidad pa despues di scol siña toca un instrumento musical
ORANJESTAD – Diabierna ultimo Minister Endy Croes a ricibi bishita di fundador y director di Leerorkest Amsterdam, sr. Marco de Souza, hunto cu Leerorkest director di Aruba sr Johnny Croes y delegacion. E proyecto di Leerorkest a cuminsa na Aruba aña 2019 pa e alumnonan di klas 2 te cu klas 6 di scol basico. Actualmente tin cinco scol ta participa den e proyecto piloto; Colegio Laura Wernet Paskel, Prinses Amalia Basisschool, St. Paulus School, SOAZA y Graf von Zinzendorf. Leerorkest Aruba tin como meta pa tur mucha na Aruba haya e oportunidad pa siña toca un instrument musical durante y despues di orario di scol.
E alumnonan ta siña toca seis diferente instrument musical: cello, dwarsfluit, clarinet, trompet y trombone. Na fin di aña escolar mas o menos 300 alumno a particpa den un concierto tocando, cantando y bailando cu yen di entusiasmo. Leerorkest tin un programa di les online na unda mas di 2000 alumnonan a sigui les musical. Minister Endy Croes a sigui bisa cu e Leerorkest ta prepara pa cuminsa e proyecto na 15 scol basico di SKOA.
Minister di Husticia y Asuntonan Social Rocco Tjon y Minister di Enseñansa & Deporte Endy Croes a propone pa amplia e proyecto di Leerorkest cu lesnan despues di scol den tres diferente districto na Aruba. E proyecto aki lo wordo subsidia pa Leerorkest Hulanda, Ministerio di Husticia y Asuntonan Social y Ministerio di Enseñansa y Deporte.
