Recientemente, Minister di Husticia, Integracion, Transporte Publico y Energia, mr. drs. Arthur Dowers, a ricibi Marcel Maduro, ex hefe di Landsrecherche, cu a baha cu pensioen dia 8 di september 2026, despues di 44 aña di servicio publico.
Marcel Maduro a dedica gran parti di su bida profesional na servicio di husticia y siguridad di Aruba.
Na 1982 Maduro a inicia su carera den Korps Politie Nederlandse Antillen como contractant. Na 1985, despues di termina su formacion policial na Aruba, el a cuminsa traha como aspirant agent na Oranjestad, ainda bao di Korps Politie Nederlandse Antillen.
Na 1987 Maduro a pasa pa Sectie Justitiële Dienst Oranjestad como recherche y despues a traha den e seccion di Crimen Organisa. Na 1997 el a incorpora den Recherche Samenwerkings-Team (RST), caminda el a traha te aña 2000.
Na 2007 Marcel Maduro a asumi e funcion di hefe di Landsrecherche. Bao di su liderazgo, e entidad a crece di 7 empleado te 20 empleado, di cual 17 ta recherche.
Durante e encuentro tabata un momento oportuno pa expresa aprecio pa su dedicacion y compromiso durante su carera, y pa reconoce su contribucion na desaroyo di Landsrecherche y na servicio di husticia di Aruba.
Como muestra di aprecio y reconocimento pa su dedicacion y contribucion na servicio publico, Minister Arthur Dowers a haci entrega di un plakaat di reconocimento na Marcel Maduro y a desea Maduro un pensioen bon mereci.
