Dialuna 23 di juni, Minister di Salubridad Publico, drs. Mervin Wyatt-Ras, acompaña pa Prome Minister, mr. Mike Eman, a haci un bishita oficial na Hospital Horacio Oduber (HOH), na unda a tuma luga e traspaso simbolico di yabi di e Laboratorio nobo di HOH, for di Gobierno di Aruba pa man di directiva di Hospital.
Durante e acto, Prome Minister Mike Eman a pone enfasis riba e vision strategico di su gabinete durante anjanan anterior, den cual a identifica e necesidad urgente pa renoba y amplia e facilidadnan medico di Aruba. Cu un poblacion den crecemento y un hospital cu tabata enfrenta deterioro, a considera diferente opcion, incluyendo construi un hospital completamente nobo na un sitio mas central riba nos isla. Pero, despues di un evaluacion profundo di infrastructura y facilidadnan existente, y su posicion strategico pa local y turista, a tuma e decision visionario pa renoba y amplia e hospital.
Prome Minister a enfatisa cu Gobierno di Aruba tabata wak mas leu, mirando un Aruba cu no solamente hotelnan di cinco strea pa e turistanan, pero tambe un sistema di cuido medico di cinco strea pa nos hendenan. Tempo cu a inicia cu e proyecto aki, Minister Richard Visser y despues Minister dr. Alex Schwengle, a mira e balor di e vision di Gobierno cu tabata mira mas leu cu un Aruba cu hotelnan di cinco strea pa nos turistanan. Cuido medico, tambe mester a bira di cinco strea y e vision aki a forma e base pa e inversion pa eleva no solamente nos hospital sino cuido medico na nivel di cinco strea.
Minister Wyatt-Ras a expresa su profundo gratitud na directiva di SOGA pa e rol crucial den supervision di e proyecto di expansion, durante un trayecto cu a dura mas cu dies aña, confrontando varios obstaculo, pero cu perseverancia a yega na un final exitoso. E traspaso di laboratorio HOH ta representa un paso final importante na caminda pa e gran apertura dia 27 di september proximo, na unda oficialmente lo corta cinta di nos hospital completamente transforma.
Minister Wyatt-Ras a recorda cu durante su temporada den Parlamento, hopi parlamentario tabata cuestiona e opinion di Wyatt-Ras, cu Aruba su hospital lo bira un joya den Caribe comparable cu e miho hospitalnan na Merca. Awe, e minister ta confirma esey personalmente, y ta orguyosa di e transformacion cu Aruba a logra.
Prome Minister Mike Eman a haci un comparacion entre e hospital bieu y e facilidad moderno di awe. Pa Prome Minister e hospital bieu tabata refleha un situacion di un pais den desaroyo, sin mucho privacidad pa pashent y cu limitacion pa e personal medico por funciona debidamente. Awe, Aruba tin un hospital moderno, y ta duna cuido medico di calidad, humano y digno.
Aruba por ta orguyoso. E entrega di e laboratorio nobo no ta solamente un acto simbolico, pero un testimonio di un vision, planifica y realisa pa haci Horacio Oduber Hospital un centro di cuido di excelencia cu un ekipo medico bon capacita, tecnologia ultra moderno, personal capacita y servicio pa pashent excepcional.
