Parlamento di Aruba a continua cu e tratamento di e Presupuesto Supletorio 2025. Durante e reunion publico, Minister Dowers a hiba palabra pa defende su maneho desde cu a tuma encargo di e Ministerio di Husticia.
Segun Minister Dowers, ex-Minister Tjon lo a crea un proyecto pa cual e lo a aloca un suma di 4.5 miyon florin pa renobacion di Scol di Polis. Den combersacion cu DOW, nan a indica cu berdad nan a duna informacion pa por crea e proyecto aki pero na final di dia Tjon no a aloca ni un cen pa e proyecto. Minister Dowers di su banda, si a aloca 1.5 miyon florin pa e renobacion y modernisacion di Scol di Polis Watty Vos. Minister Dowers a pidi ex Minister Rocco Tjon wak su cara den spiel y wak si e refleho ta esun di un narcista of di un egoista.
Minister Dowers, a splica entre otro cu ta trahando riba e uzo di “electronische detentie” y cu por uza esaki pa castigonan di duracion di cierto tempo y cu ta huez lo mester dicidi segun cada caso si esaki ta aplicabel pa e persona cu ta haya condena. E proceso pa e proyecto piloto aki ta den man di reclasering y segun nan evaluacion, lo mira den cua caso por aplica esaki.
Ademas, hunto cu stakeholders ta trahando riba maneho pa Directie Justitie. Den pasado a inicia caba cu e proyecto aki y lo continua cu esaki den e siguiente periodo como Minister di Husticia. Directie Justitie lo bay haci un diferencia grandi pa maneho, consistencia y continuidad di maneho den futuro.
Cu tin un falta di personal den e sector di husticia ta conoci y segun e mandatario di Husticia, e solucion pa e falta di personal ta pa haci un analisis profundo y realoca fondo y personal, pero mester recluta personal nobo den futuro. Minister Dowers a pidi Departamento di Recurso Humano pa haya tur vacatura cu tin habri den e sector di husticia pa haya un bista cla y si mester, lo wanta cierto vacatura den otro departamento temporalmente pa por enfoca riba e vacaturanan den husticia. Na Brandweer ya ta trahando riba un sistema di shift di 24 ora cu ta crea alivio pa e trahadonan. Locual Minister Dowers a hereda ta retonan di personal den practicamnete tur departamento di husticia.
