Diahuebs mainta, Minister di Husticia mr. drs. Arthur Dowers a haci un bishita na Directie Voogdijraad (DVR) caminda Aisca Berkemeyer, directora di Directie Voogdijraad, a ricibi e mandatario.
Durante e bishita, Minister Dowers a haya oportunidad pa conoce mas di cerca e trabao importante cu Directie Voogdijraad ta ehecuta den nos comunidad. Atencion a bay entre otro pa e responsabilidadnan di Voogdijraad, e manera cu e organisacion ta funciona den practica y e retonan cu e personal ta enfrenta den nan trabao diario.
Como parti di e programa, Minister Dowers a ricibi tambe un presentacion di funcionamento di e sistema cu Voogdijraad ta uza den ehecucion di su trabao. Durante e presentacion a duna un bista di con e sistema ta sostene e procesonan di trabao y con ta registra informacion y maneha esaki. Esaki a duna Minister un miho comprondemento di e manera cu Voogdijraad ta organisa y procesa su casonan den practica.
Directie Voogdijraad tin un rol importante den proteccion y bienestar di menor di edad y den duna sosten na instancianan hudicial den casonan cu ta toca menor y famia. E trabao aki ta exigi no solamente conocemento profesional, pero tambe un bon cooperacion entre diferente partnernan den cadena di husticia y instancianan cu ta traha den area social.
Minister Dowers a expresa su aprecio pa e dedicacion di e staff y personal di Voogdijraad y a enfatisa e importancia pa sigui fortalece tanto e organisacion como e cooperacion.
Proteccion di nos muchanan ta un responsabilidad cu mester carga hunto como pais. E profesionalnan cu ta traha diariamente cu menor y famianan ta haci un trabao sumamente importante. Gobierno mester sigui crea e condicionnan necesario pa nan por ehecuta e responsabilidad aki di forma profesional y efectivo.
