Minister di Husticia, Integridad, Transporte Publico y Energia, mr. drs. Arthur Dowers, a instala oficialmente e Task Fforce Aanpak Afvalproblematiek, cu e encargo pa prepara proposicionnan concreto pa un maneho di desperdicio duradero, integral y responsabel pa Aruba, y sostene ehecucion di e maneho integral.
Aruba ta enfrenta problema di desperdicio pa hopi aña. Pa logra un solucion structural, Gobierno ta considera necesario pa atende e tema den un forma integral, cu participacion di e diferente departamentonan y organisacionnan cu tin responsabilidad of experencia riba tereno di medio ambiente, infrastructura, mantencion, supervision y procesamento di desperdicio. A institui e Task Fforce oficialmente entrante 1 di september 2026.
Dia 8 di september a tene e prome reunion di e Task Fforce, durante cual e diferente organisacionnan a comparti informacion tocante nan rol actual den maneho di desperdicio, e puntonan critico cu nan ta identifica y nan posibel contribucion.
Un di e puntonan principal di e Task Fforce ta prevencion y mantencion di ley relaciona cu tiramento ilegal di desperdicio. Banda di esaki, e Task Fforce lo enfoca riba un plan integral pa limpiesa y procesamento duradero di desperdicio, coleccion di data y estadistica relevante, reciclahe y procesamento di desperdicio organico y busca un solucion duradero pa financia maneho di desperdicio.
Pa Minister Dowers, Aruba no por sigui atende e problematica di desperdicio solamente ora e problema ta visibel. Un solucion duradero ta exigi prevencion, responsabilidad, control y cooperacion entre tur e instancianan envolvi.
E Task Fforce tin tambe como tarea pa evalua si mester adapta leynan existente of si tin necesidad pa leynan nobo. Ademas, e mester crea e apoyo necesario pa implementa e proposicionnan cu lo presenta.
E Task Fforce ta consisti di representantenan di e Ministernan encarga cu maneho di desperdicio y energia (Minister Dowers), medio ambiente (Minister Eman) y infrastructura (Minister Herdé). Ademas e Task Force ta consisti diy expertonan di diferente departamento y organisacion, entre manera Directie Natuur en Milieu, Directie Economische Zaken, Ministerio di Infrastructura, Ministerio di Turismo, DOW, Bureau City Inspector, Serlimar, Utilities , AWSS y WEB Aruba N.V. Ademas e Task Force ta conta cu participacion di DEHZI y representante di Ministerio encarga cu Turismo (Minister Cicilia).
E meta final ta pa presenta proposicionnan concreto na Minister Dowers pa un maneho di desperdicio structura, duradero y responsabel, pa por sostene y promove implementacion di e maneho y proyectonan aproba.
Cu instalacion di e Task Fforce, Gobierno ta pone un paso pa pasa di un maneho fragmenta na un solucion mas coordina y structural pa e problematica di desperdicio na Aruba.
