Minister di Husticia, Integridad y Transporte Publico, mr. drs. Arthur Dowers, hunto cu Comandante di Cuerpo di Bombero Aruba, a presenta oficialmente dos vehiculo Aircraft Rescue and Fire Fighting (ARFF) nobo na Brandweer Airport.
E vehiculonan ta di marca Rosenbauer, modelo PANTHER 6×6, y ta specialmente diseña pa atende emergencia relaciona cu aviacion. Nan ta forma parti di un compra di tres vehiculo ARFF, cu un inversion total di Afl. 8.488.483,12 di cual dos vehiculo ta na Aruba mientras e tercer ta yegando prome cu fin di aña.
Cada vehiculo tin capacidad pa transporta 11.400 liter di awa, 1.600 liter di foam y 250 kilo di puiro pa paga candela.
Durante e presentacion, Minister Dowers a enfatisa importancia di e inversion pa siguridad di Aeropuerto Internacional Reina Beatrix y pa capacidad operacional di Brandweer Airport.
Aeropuerto Internacional Reina Beatrix ta un infrastructura crucial pa Aruba. Conectividad aereo ta esencial pa turismo, economia y conexion di nos pais cu resto di mundo. P’esey, Aruba mester dispone di material moderno y specialisa pa responde na emergencia di aviacion na un nivel halto.
Tecnologia moderno ta pone miho instrumento den man di e profesionalnan, pero cu tecnologia so no ta suficiente. Ta preparacion, entrenamento, experencia y dedicacion di nos bomberonan cu finalmente ta haci e diferencia. Awo cu Brandweer ta dispone di e ekiponan moderno aki, e personal mester haya curso pa maneha esakinan optimalmente.
Cu e vehiculonan ARFF nobo, Gobierno ta fortalece preparacion y capacidad di responde di Brandweer Airport, mientras ta inverti den proteccion di pasahero, tripulacion, personal di aeropuerto y e bomberonan cu diariamente ta para cla pa actua.
