Recientemente, Minister di Husticia, Integracion y Transporte Publico y Energia, mr. drs. Arthur Dowers, a realisa un bishita di trabao na Respaldo, un instituto specialisa den cuido di salud mental na Aruba.
Durante e bishita, minister Dowers a haya un presentacion di Manager Zorg, sra. Miloushka Boekhoudt-Wernet, MSc., y Manager Behandelzaken y Psikiatra, sra. drs. Nathalie Kingsale. E presentacion a duna un bista mas amplio di e diferente servicionan, tratamento y cuido specialisa cu Respaldo ta brinda na personanan cu ta enfrenta desafionan relaciona cu nan salud mental.
Como parti di e programa, minister Dowers a ricibi un rondleiding pa familiarisa su mes mas cu e facilidadnan y e trabao cu e profesionalnan di Respaldo ta realisa diariamente.
Salud mental ta un aspecto esencial di bienestar di nos comunidad y un tema cu merece atencion serio. E desafionan relaciona cu salud mental no ta afecta solamente e persona concerni, sino tambe su famia y e comunidad den su totalidad.
Den e contexto di husticia y siguridad publico, e importancia di cuido di salud mental ta particularmente relevante. Situacionnan caminda personanan cu problema di salud mental ta bin den contacto cu autoridadnan ta demonstra e necesidad di un enfoke integral, caminda cuido specialisa, prevencion y cooperacion entre diferente instancia ta central.
Minister Dowers ta considera importante pa fortalece e dialogo y cooperacion entre e sector di husticia y organisacionnan specialisa den salud mental, cu e meta di contribui na un maneho mas adecua di situacionnan compleho y na bienestar di nos comunidad.
E bishita di trabao na Respaldo ta forma parti di e esfuersonan di minister Dowers pa mantene un dialogo directo cu organisacionnan cu ta brinda servicionan esencial na nos comunidad, fortalece e cooperacion existente y haya un bista actualisa di e desaroyonan y desafionan den cuido di salud mental na Aruba.
