Minister drs. Rene Herde y Minister mr. Wendrick Cicilia tabata presente diabierna merdia na waf di Barcadera, opera door di Aruba Stevedoring Company (ASTEC) pa asina ricibi mas informacion tocante e parti operacional y e proyectonan di e compania.
“E ta un operacion impresionante aki na Barcadera”, tabata e prome expresion di Minister drs. Rene Herde. Cada decision logistico aplica pa un operacion ‘smooth’ ta demostra e profesionalismo cu tin na e waf. Esey ta splica su exito den apenas algun aña!
“E posicion competitivo cu ASTEC tin den Caribe ta demostra e profesionalismo di nos hendenan cu ta opera e compania. E inversionnan haci y e vision pa muda e waf di carga pa Barcadera a haci cu a crea un facilidad cu por expande hopi mas. Di tur loke Minister Herdé y Minister Cicilia a tende for di dirigentenan di e waf, ta mustra cu tin oportunidadnan pa sigui desaroya y cu nan ta bon consciente di esey.”
E decision pa muda e waf y e compra di e crane – riba insistencia di Gabinete Eman II- tabata necesario pa tin un miho operacion den waf y pa haci e waf uno cu capacidad pa atrae clientenan nobo den futuro. Durante di e bishita a baha un motor RECIP cu un ekipo special pa hiba WEB. Diadomingo a transporta e motor RECIP pa WEB.
Tabata interesante pa Minister drs. Rene Herdé mira kico tur nos profesionalnan ta haci na ASTEC y con un compania funda door di casi 10 compania chikito cu tabata opera riba waf na aña 1983 awe ta un ehempel den henter Caribe. Minister Herdé a expresa cu: “Ora bo combina un vision politico pa realmente construi un pais pa futuro, cu e boluntad di gobierno y di empresarionan priva, curashi combina y e capacidad di trahadonan, bo ta crea e tipo di resultadonan bunita aki pa nos pais.”
