Minister Ursell Arends, responsabel pa naturalesa di Aruba a ricibi e “Aruba Bird Calendar 2022” for di Greg Peterson di Fundacion Aruba Birdlife Conservation.
Esaki lo ta e di 15 aña cu Aruba Bird Life Conservation ta publica e “Aruba Birdlife Calendar”
Un biaha mas, no menos cu 9 (nuebe) fotografo di naturalesa a contribui cu nan potretnan di pahra. Nan ta, Damilice Mansur, Ross Boss Wauben, Peter Sprockel, Albert Peterson, Michiel Oversteegen, Michael Tromp, Patrick Peña, Glenda Tromp y Greg Peterson.
E calendarionan ta obtenibel pa 12,50 florin y por cumpranan na Best Deal na Paradera, Toko Dakota na Dakota, na cuater diferente botica, Botica Eagle, Botica Noord, Botica Maria y Botica Sero Preto y tambe na e negoshinan Op=Op na Italiëstraat, na Paradera y na San Nicolas. E ingresonan ta pa e fundacion usa pa propositonan di conservacion.
E president di e fundacion Aruba Birdlife Conservation a keda hopi contento cu e calendario nobo y hopi agradecido na tur esnan cu a duna nan contribucion.
E ingresonan lo wordo inverti den proyectonan di conscientisacion y conservacion di naturalesa. Un di e proyectonan conoci na Aruba cu lo destina fondo na dje lo ta e “Proyecto conservacion di Shoco”, unda lo instala neishi artificial pa mehora e posibilidad di procreacion di e Shoco di Aruba endemico cu ta core peliger di extincion. Tambe ta trahando riba un website cu informacion di parhanan di Aruba.
Donacion tambe ta hopi bonbini y por hasi esei na nomber di “Foundation Aruba Birdlife Conservation”, Aruba Bank N.V., riba number di cuenta no.2402860190.
