ORANJESTAD – Recientemente Minister di Enseñansa y Deporte Endy Croes tabatin su prome encuentro pa sera conoci y combersa cu e directornan di scolnan secundario di Dienst Publieke Scholen cu ta resorta directamente bou di Ministerio di Enseñansa. E reunion a tuma luga na JFK Education Center. E tabata un bon reunion unda cu e directornan por a vocifera nan inkietudnan. Hunto cu Minister Endy Croes su dos conseheronan riba tereno di enseñansa tambe tabata presente pa scucha diferente puntonan di preocupacion a wordo treci pa dilanti.
Durante e reunion abierto diferente puntonan cu a bin dilanti manera entre otro; (1) E maneho di no keda sinta y (2) ‘Taakuren’ / ‘overuren’. Mescos cu e cabesantenan di scolnan basico, e directornan di e scolnan secundario tampoco no ta di acuerdo cu e maneho di no keda sinta.
E inkietudnan lo wordo atendi y lo combersa cu expertonan riba e tereno di enseñansa pa e desicionan por wordo tuma na bienestar di educacion. E directornan a expresa di ta contento cu nan ta haya oido y participacion serca Minister di Enseñansa
Minister Endy Croes a scucha cu atencion tur puntonan cu a keda treci dilanti y e prioridadnan pa cu e tereno di enseñansa. Minister Endy Croes su deseo y empeño ta pa soluciona problematicanan mas tanto posibel, crea espacio pa trankilidad, paz y mehoracion den e tereno di Enseñansa.
