ORANJESTAD: Diahuebs atardi duranta conferencia di prensa cu a tuma luga JFK Education Center Minister Endy Croes a presenta Premio Excelencia den Deporte (PED) 2019 y 2021. Presente na e ocasion aki tabata Parlamentarionan, presidente y miembronan di directiva di e diferente, federacionnan, Ibisa, FFD, FLPD, SSA, Directie Onderwijs, Inspectie Onderwijs, mayoria di atletanan cu ta nomina y demas invitadonan.
Premio Excelencia den Deporte ta reconoce e atletanan cu mas a destaca den nan deporte durante aña 2019 y 2021. E atletanan cu mester a ricibi nan premio na aña 2019 pa motibo di e pandemia no a ricibi esaki den 2020 y e aña aki nan ta wordo reconoci y ta ricibi nan premio.
Na aña 2020 mayoria federacion no por a organisa eventonan deportivo door di e pandemia. Pa aña 2021 e federacionan a manda nomber di nan atletanan cu mas destaca y ta wordo reconoci dia 20 di augustus den un anochi di gala dedica specialmente na nan.
Mester remarca cu e interes tabata grandi na unda 16 federacion a manda oficialmente nan nominadonan conforme e rekisitonan. Un total di 75 atleta a wordo nomina den e diferente categorianan di aña 2021.
E comision encarga pa scoge e ganadonan ta consisti di cinco profesional cu tin e afinidad den prensa deportivo. E rekisitonan pa saca e ganadonan ta basa riba e si siguiente reglamentonan; 1. prestacion local, 2. prestacion internacional y 3. prestacion den comunidad di Aruba.
Un premio nobo:
Pa prome biaha ta introduci e categoria di ekipo di aña pa asina duna oportunidad husto na federacionan colectivo pa por competi pa e premio di ‘ekipo di aña’.
Durante e ceremonia ta bay tin premionan manera; 141 medaya, certificado pa tur atleta, 22 plakkaat pe ganadonan, 10 plakkaat pa e baluarte deportivo como tambe premionan efectivo. E comision organisado lo rindi homenahe na 10 baluarte deportivo cu a dedica gran parti di nan bida den deporte di Aruba. Aruba ta keda cordialmente invita pa sintonisa e anochi mas grandi den deporte di Aruba dia 20 di augustus cuminsando pa 8’or di anochi en bibo via nos planta nacional Tele Aruba.
