Minister Endy Croes a elabora durante cu tabatin reunion cu Presidente di SIMAR, sra. Josephine Albertus y sra. Frances Figaroa unda nos a reuni riba diferente punto. Siman pasa SIMAR a manda un carta cu dies punto di atencion y nos a pasa door di tur e puntonan aki manera entre otro; invallers smw’ers, algun problematica rond di DPS cu nos ta bezig cu diferente solucionnan eyden tambe.
Un di nan ta e trahadornan di SKOA cu nos a duna un amplio splicacion unda nos ta moviendo pa dilanti tin ful un comision trahando riba esaki. Tambe riba e instructornan di landamento cu ya caba nos a regla y nos ta bezig ta regla algo un poco mas miho. Tambe nos por a mustra cu nos tabatin cartanan cu a bay pa conseho y asina nos por bisa den un ‘nutshell’ un cantidad di puntonan cu tabata molestia diferente hende den e veld nos tin nos comisionnan ta trahando riba tur caba. Pues ta un cantidad di trabou paralelo cada grupo riba su mes ta moviendo cu diferente di e puntonan aki pa mas lihe posibel nos por cuminsa yega na solucionnan
Minister Endy Croes a sigui bisa ta menos cu sesenta dia nos tin den e funcion aki nos por a nota di algun problematica di aña 2005 y 2014 cu tabata prome cu nos tempo cu nos a tuma nota di esakinan. Esakinan tabata nobo pa nos. Nos lo bay duna nan atencion. Minister endy Croes a sigui bisa cu presidente di SIMAR a regalanos un rapport cu e mes a skirbi ‘Onderwijs systeem op Bonaire’ ta trata di un bishita cu e mes a haci personalmente na Bonairo y a reuni cu tur e ‘stakeholders’ den e veld. Nos ta haya esaki hopi interesante, nos lo bay repasa esaki y mi a palabra cu ne cu pronto e lo duna nos un presentacion.
Un reunion cu a bay den un bon esfera manera mi a bisa nos ta busca e paz y trankilidad pa cu e tereno di enseñansa. Nos ta poniendo atencion ariba cantidad di puntonan di preocupacion hunto cu e conseheronan nos tabata tin reunion dos siman pasa cu diferente cabesantenan di scolnan preparatorio y bascio di DPS.
Ayera tabatin reunion cu tur e MAVO y HAVO di DPS. Nos a sinta tambe cu directora di SKOA sra. Bally na mas cu un ocasion, nos a sinta cu diferente directornan di departamentonan; Directie Onderwijs, Inspectie Onderwijs DUOS, DPS, Bureau Leerplicht y Studiefinanciering. Nos ta eherciendo den corto tempo hopi trabou cu hopi amor. Nos sa cu e tereno di enseñansa mester di atencion. Mi ta kere cu den sesenta dia e Gobierno aki no por resolve tur cos.
Mayoria di e puntonan tin nos atencion. Mi por mira atras riba un reunion fructifero y mi ta termina splicando cu loke mi a campaña cu porta habri, solucion concreto. Mi portanan di oficina semper lo keda habri pa SIMAR tambe y dialogando tene e veld trankil, scucha, Analisa y tuma e miho decision na beinestar di enseñansa en general mi ta kere cu nos lo sali afo.
