Cu a gana medaya di oro pa Aruba den Weganan Centro Americano y Del Caribe di Mar y Playa na Santa Marta, Colombia.
ORANJESTAD: Diahuebs atardi mandatario di Deporte a ricibi atleta Malik Hoveling na su yega na Aruba. Malik a gana medaya di oro den Weganan Centro Americano y Del Caribe di Mar y Playa na Santa Marta, Colombia den e disciplina di sailing.
Despues di e triunfa cuater dia di careda nabega sin perde uno, diaranson ultimo Malik Hoveling a pone un stempel riba e prome luga y e prome medaya di oro pa Aruba den e Weganan Centro Americano y Del Caribe di Mar y Playa. Cu e tremendo prestacion aki Malik a logra clasifica den e disciplina di sailing pa e Weganan Panamericano Santiago 2023 cu ta tuma luga otro aña na Chile.
Minister Endy Croes ta felicita Malik Hoveling, mayornan, na su coach Sam Vandormael y federacion di sailing cu e excelente prestacion y logro aki pa pais Aruba. Malik danki pa laga Aruba su nomber briya den exterior! Cu bo deseo, disciplina, dedicacion, determacion bo a logra! Masha pabien!
