ORANJESTAD; Minister di Enseñansa y Deporte Endy Croes ta recorda e lucha di Betico Croes pa cu Status Aparte en conexion cu Dia di Betico. Dia 25 di januari ta e fecha natalicio di nos Libertador Betico Croes y si Betico tabata na bida e lo a cumpli 84 aña. Importante pa nos tene e lucha di Betico Croes bibo den nos memoria traspasando esaki di generacion pa generacion. Loke Betico a logra pa e pueblo aki esta nos Status Aparte t’e piesa di mas importante cual a percura p’e desaroyo di nos pais.
Barco di Libertad un simbolo y icono di libertad:
E ‘Barco di Libertad’ ta un simbolo y icono hopi importante di e lucha pa Status Aparte. Un grupo di amigo kendenan fielmente a sostene Betico den su lucha pa Status Aparte a dicidi di arma un truck “flatbom” cu speakers y sonido. Den final di añanan 70 y inicio di aña 80 den cayente di e lucha pa Status Aparte mundo no tabata conoce tecnologia manera celular, Facebook, whatsapp etc. Pues pa comunica cu pueblo e tempo aya ta “CB”, radio, television y corant tabata hunga un rol importante banda di telefon liña duro y pamfleta . E Barco di Libertad tabata sali practicamente tur atardi recore Aruba di skina pa skina pa asina hiba e mensahe di Betico den cuadro cu e lucha pa Status Aparte. Banda di esaki nan tabata toca musicanan di e partido MEP y cancionnan di Betico pero tambe musicanan sentimental pa crea mas aun e amor patria. Betico na diferente reunionnan publico tabata usa e sistema di speaker di e Barco di Libertad pa comunica cu pueblo. E Barco di Libertad tabata compaña Betico durante paradanan di auto durante eleccion. Dia 24 di April 1983 tempo Betico a wordo tira riba veld di Nadi Croes/Crismo Angela (antes Winston) door di un agente policial, e Barco di Libertad tabata algun auto tras di e Jeep di Betico y a presencia esaki hopi di serca. E ekipo di e Barco di Libertad tabata soldaatnan di e lucha hopi fiel y leal na Betico. Den cuadro di e importancia di e Barco di Libertad hibando e mensahe pa asina uni pueblo den e lucha nos ta sinti cu esaki mester su luga den historia y lo cuminsa canalisa e posibilidadnan.
Mas di historia BMW “Do the Whiper” y Barco di Libertad:
E Barco di Libertad den inicio di añanan 90 a wordo traspasa pa e banda popular BMW. E Barco di Libertad a fungi como ‘flatbom’ truck di musica pa algun aña unda BMW tabata haci uso di dje den nan gloria. Sinembargo e Barco di Libertad e tempo ey su break, wiper y motor no tabata funciona debidamente. Den un parada na San Nicolas publico mester a pusha e Barco di Libertad cu a dal paga den parada cu BMW tocando nonestop pa e por a yega final. Di e storianan real aki BMW e banda popular di e tempo ey a composita e cantica inmortal “Do the Whiper”
Barco di Libertad a wordo tuma bek:
Den final di añanan 90 drentando aña 2000 Y2K a dicidi pa tuma e Barco di Libertad bek for di organisacion BMW unda a repara esaki y a prepare pa eleccion. Eleccion 2001 e Barco di Libertad a subi caminda bek pa partido MEP unda MEP a gana aplastante cu 12 asiento. Ultimo eleccion cu e Barco di Libertad a subi caminda tabata na 2005. Pues e famoso Barco di Libertad kende tabata tin su rol importante den historia tin 16 aña awor hancra. Preparando pa celebracion di dia Nacional Dia di Betico 25 di januari proximo ta bon pa nos skirbi parti di e historia. Nombernan manera Len Besselink, Benny Vrolijk y otronan manera Jean, Dubero, Swindo Dubero, Quedais y Everaldo Croes (q.e.p.d) tabata algun di e militancia y ekipo di e Barco di Libertad. Lo sondea tur posibilidad pa duna e simbolo y icono aki su luga den e historia real di e lucha pa Status Aparte. Danki Betico pa bo vision y determinacion y danki pueblo pa a sostene e lucha di Status Aparte. Ban conserbe!
