Durante e prome seis lunanan di 2026, un total di 242 permiso a wordo otorga pa establecimento di negoshi nobo na Aruba. E cifranan mas reciente di Directie Economische Zaken, Handel en Industrie (DEZHI) ta mustra cu iniciativa empresarial ta continua den diferente sector di nos economia.
Den e di dos kwartaal di 2026, un total di 104 permiso pa negoshi nobo a wordo otorga. Di esakinan, 69 ta pa VBA, 18 pa eenmanszaak, 16 pa filiaal y 1 pa NV. E actividadnan mas representa ta inclui real estate, construccion y instalacion tecnico, houdstermaatschappij, huurmento di auto, koffiehuis y restaurant, comercio di alimento, paña y accesorio, como tambe e-commerce. E cifranan ta mustra cu actividad empresarial ta sigui diversifica den diferente ramo di economia Arubano.
Durante april te cu juni 2026, DEZHI a ricibi un total di 753 registro den e sistema relaciona cu permiso y cambio empresarial. E total aki ta inclui 245 intrekking ambtshalve, cu ta accionnan administrativo interno y no peticion entrega door di cliente. Den e mesun kwartaal, un total di 562 beschikking ministerial a wordo firma, incluyendo peticionnan ricibi den e kwartaal y peticionnan cu tabata den proceso for di anteriormente.
Minister di Finansa, Asunto Economico y Sector Primario, Geoffrey Wever, ta indica cu e cifranan mester wordo mira den contexto di un economia cu ta sigui crea espacio pa iniciativa priva.
“Comercio ta un motor esencial di nos economia. Cada negoshi nobo ta representa un persona cu ta tuma iniciativa, inverti y crea actividad economico. Tarea di Gobierno ta pa crea e condicionnan corecto, kita barrera innecesario y haci e proceso pa establece un negoshi mas claro, accesibel y eficiente. Esey ta e direccion cu nos ta sigui mantene,” segun Minister Wever.
Un aspecto importante den e maneho economico ta revitalisacion di centro di Oranjestad y San Nicolas. Di e 242 negoshinan nobo registra entre januari y juni 2026, 12 a establece dentro di e areanan di centro defini conform ROPV: seis den centro di Oranjestad y seis den centro di San Nicolas. E negoshinan aki ta inclui actividadnan manera houdstermaatschappij, real estate, establecimento di cuminda, oficina administrativo y otro servicio empresarial. Esaki ta demostra tambe cu e incentivanan fiscal cu a introduci 1 di januari 2026 a cuminsa duna su frutonan. Cu e introduccion di e maneho fiscal aki, Gobierno AVP-FUTURO ta haciendo un intento serio oa crea un clima di inversion cla y transparente pa e centronan historico. Door di uni gobierno y sector priva, ta stimula cu e centro di Oranjestad y San Nicolas ta wordo revitalisa y cu e edificionan por wordo usa pa vivienda, restaurant, café, oficina y retail.
E maneho ta di acuerdo cu e Programa di Gobernacion AVP-FUTURO 2025–2028 y ta sigui e recomendacionnan di e “Commission Economic Recovery 2023”, un commision cu Minister Wever a institui y lidera pa bin cu incentivanan fiscal consistiendo e tempo ey di KVK, ATIA, AHATA, Freezone, DEZHI, diferente abogado, diferente fiscalista y diferente accountants.
E distribucion geografico ta mustra cu actividad empresarial ta tuma luga den henter Aruba. Noord/Tanki Leendert a registra e cantidad mas halto cu 78 establecimiento nobo, sigui pa Oranjestad Oost cu 50, Oranjestad West cu 42, Paradera y Santa Cruz cu 25 cada uno, Savaneta cu 13, San Nicolas Zuid cu 6 y San Nicolas Noord cu 3.
Desde oktober 2022, bou di responsabilidad di Minister Wever, Gobierno a introduci un vestigingsbeleid nobo cu ta enfoca riba simplificacion di rekisitonan, digitalisacion di e proceso y reduccion di barrera administrativo pa haci negoshi. E linea di maneho aki ta sigui ta importante pa crea un clima unda empresario por move cu mas claridad y unda Gobierno ta facilita actividad economico na un manera controla y structural.
Despues di un aña record den 2025, cu 880 permiso pa negoshi nobo, Gobierno ta sigui enfoca riba consolida e condicionnan necesario pa actividad empresarial por desaroya, diversifica y contribui na creacion di oportunidad economico. E prioridad no ta solamente pa procesa permiso, sino pa crea un ambiente empresarial cu ta inspira confianza, facilita inversion y fortalece e base productivo di Aruba.
Minister Wever ta gradici e team di DEZHI pa e trabou continuo den ehecucion di Vestigingsverordening Bedrijven y pa procesa e diferente peticionnan na un manera profesional, transparente y eficiente. Gobierno lo sigui evalua y mehora e proceso di aplicacion pa permiso, mientras cu e maneho economico ta keda enfoca riba mas actividad economico, mas inversion y un economia mas diversifica y resiliente.
