Minister di Finansa, Asunto Economico y Sector Primario, mr. Geoffrey Wever, a organisa un serie di Town Halls pa amplia e comprendemento di e concensus Rijkswet houdbare overheidsfinanciën (HOFA) y e Landsverordering waarborging houdbare overheidsfinanciën (Lwho) cu diferente organisacion den nos comunidad.
Durante e serie di town halls lo reuni cu varios gremio y organisacionnan di comunidad. Siman pasa a tuma luga e prome sesion di e serie, unda a reuni cu e gremio di sector hotelero AHATA, y su miembronan. E presentacion ta enfoca riba e contenido legal di e rijkswet y e ley local, y riba e impacto real y beneficionan financiero pa Aruba. AHATA y su miembronan ta hunga un rol sumamente importante den e economia di Aruba, considerando cu e sector hotelero ta e dunador di trabou mas grandi na Aruba.
Durante e presentacion, Minister Wever a splica kiko ta e beneficionan financiero directo pa pais Aruba. Tambe a duna espacio pa por a hiba un dialogo habri entre e miembronan di AHATA y Minister Wever, unda participantenan a haya oportunidad pa haci pregunta y discuti preocupacionnan.
Un punto central durante e presentacion tabata e beneficio financiero directo pa pais Aruba y e comunidad. Minister Wever a splica cu e Rijkswet HOFA lo duna Aruba un reducion di interes di Afl. 128 miyon riba e prestamo di Afl. 916 miyon cu Aruba a sera cu Hulanda durante COVID y tambe cu Hulanda lo refinancia 6 prestamo cu Aruba tin cu banconan internacional cu un reduccion di Afl. 238.5 miyon, pues den total un reduccion di minimo Afl. 366.5 miyon na interes cu Aruba por inverti den enseñansa, infrastructura, economia, sector primario etc. Riba e COVID lening cu Aruba tin cu Hulanda Aruba ta pagando 6.9% interes cu bow di e HOFA lo bira mas o menos 3.5% di interest, dunando Aruba un reduccion di interes di Afl. 128 miyon y riba e prestamonan cu Aruba tin riba mercado internacional Aruba, Aruba ta pagando mas o menos 6.5%, cu Hulanda tambe ta dispuesto pa refinancia na mas o menos 3.5%, pues Aruba lo realisa un reduccion di gasto di interes di minimo Afl. 366.5 million.
Fuera di e refinanciamento aki cu lo duna Aruba un impulso financiero di total Afl. 366.5 miyon, Aruba lo por presta placa for di Hulanda, contra un interes di mas o menos 3.2%-3.5%, na luga di mas o menos 6.5%, pa por ehempel construi un prison, un rioolwaterzuiveringsinstallatie y otro proyectonan strategico.
E refinanciamento cu Hulanda ta dispuesto pa duna Aruba na un interes asina abou, ta algo cu Aruba nunca lo por haya den mercado liber. Minister Wever a enfatisa cu e placa cu ta wordo salba na interes, lo e ora wordo reinverti den Aruba pa haci un impacto positivo. Por ehempel, den proyectonan manera drecha caminda, scolnan, transporte publico etc.. Teniendo na cuenta cu e pilar economico di Aruba di mas grandi ta Turismo, e habilidad cu e ora lo por reinverti /placa bek pa e bienestar di nos comunidad, y tambe cu ta aporta na e sector Turistico.
Tambe a wordo aclara cu e acuerdo aki ta basa riba responsabilidad comparti y madures den finansas publico di pais Aruba. Mescos cu un acuerdo bancario, una bes cu termino nan ta wordo acepta, no ta posibel pa unilateralmente cambia condicionnan of no cumpli cu obligacionnan. E sistema ta existi pa proteha y garantisa stabilidad y confiansa den nos finansa publico.
Ademas, a wordo enfatisa cu Aruba mes tin control riba su proceso dentro di e parametro nan estableci. E reglanan di maneho di nos finansa publico lo bira mas facil, mas eficiente y lo duna Aruba mas control riba su maneho financiero compara cu e sistema cu nos tin awo.
A dialoga riba un argumento cu opositornan politico ta trece dilanti, esta cu nos ta perdiendo nos autonomia. Manera declara anteriormente den e articulo aki, tin checks and balances, y e acuerdo aki ta uno “hybride” ” caminda cu e budgetrecht di Parlamento no ta wordo atacha. Ademas di esaki, gobierno a negosha di baha e cantidad di momentonan pa Rijksministerraad por duna un aanwijzing. Awor tin 8 momento cu Rijksministerraad por interveni y Aruba por hanja un aanwijzing ora no ta cumpli cu e exigencianan den e LAft. Den e Rijkswet HOFA tin solamente 3 momento cu Rijksministerraad por interveni.
Minister Wever a splica cu un parti di e acuerdo cu Hulanda lo wordo formalisa den e Rijkswet HOFA y den un ley local, esta e Landsverordening who. Minister Wever a splica con e proceso legislativo ta canando y cu recientemente Raad van Advies a conseha cu tin un articulo ta contra di nos constitucion, e articulo 38 di e Rijkswet HOFA y cu esaki lo wordo adresa na momento cu Raad van State tambe duna su conseho.
Minister Geoffrey Wever a enfatisa cu: “Ta importante pa nos comunidad haya acceso na informacion corecto y completo. Hopi biaha nos ta mira cu parti di informacion ta wordo presenta ta fuera di contexto, cu por crea confusion innecesario. Cu e iniciativa aki, nos kier duna claridad na nos stakeholders.
Cu un dialogo bon y preguntanan reflectivo, por conclui cu e prome sesion tabata uno exitoso cu e varios miembronan di AHATA. Minister Wever ta gradici CEO & Presidente di AHATA Sra. Tisa LaSorte, y henter e team di AHATA como tambe e miembronan di AHATA pa un sesion productivo. Gobierno lo continua cu e serie di Town Halls aki hunto cu diferente gremionan, organisacionnan y stakeholdernan den comunidad. Organisacionnan cu tin interes pa organisa un sesion informativo por tuma contacto via e siguente email adres: info.bmfeps@arubagovernment.aw.
