Minister di Finansa, Asunto Economico y Sector Primario, Geoffrey Wever, a tene su prome reunion oficial cu San Nicolas Business Association (SNBA), como parti di su compromiso y vision pa traha hunto cu sector priva pa impulsa desaroyo sostenibel den San Nicolas.
Durante e reunion, cu tabata caracterisa pa un ambiente di dialogo habri, SNBA a presenta nan vision pa e futuro di San Nicolas. Tambe e Fundacion Savaneta e Promer Capital a presenta e projectonan importante pa Savaneta cu nan ta trahando riba dje.
“San Nicolas y pariba di brug lo haya tur atencion di e Gabinete AVP-Futuro y e revitalisacion di San Nicolas ta un parti importante di e acuerdo di gobernacion. Nos a priminti di inverti den San Nicolas y stimula un desaroyo integral pa tur hende, y prueba di e compromiso aki tabata e groundbreaking di e promer fase di revitalisacion di e centro di San Nicolas dialuna ultimo, un proyecto cu mi tin mas cu dos aña ta prepara y porfin a inicia. Awo nos lo continua cu fase 2 cu ta e construcción di e Farmers Market, e speeltuin y embeyecemento di e area di Arubus”, segun Minister Geoffrey Wever.
Minister Wever ta gradici SNBA pa nan aporte, y a reitera su compromiso pa sigui haci di San Nicolas un simbolo di renovacion, actividad economico y orguyo pa Aruba.
