Aruba Agri Development Company N.V. ta un compania estatal di cual 100% di e accionnan ta den man di Pais Aruba, cu e meta pa stimula agricultura sostenibel y innovativo na Aruba. Aruba Agri Development Company N.V. tin un rol importante pa fortalece e sector di agricultura y crea oportunidadnan nobo pa inversionistanan local y internacional den e sector di agricultura di Aruba.
Aruba Agri Development Company N.V. su actividadnan principal ta sostene e institucion financiero den e operacion di “Agrifund” pa yuda agricultornan y empresarionan local yega na financiamento. Tambe ta promove y fortalece e empresarionan den e sector agricola y desaroya e Agri Innovation Park: un centro pa innovacion, colaboracion unda ta comparti conocimento den agricultura.
Cu e iniciativanan aki Aruba Agri Development Company N.V. ta contribui na un sector agricola mas fuerte, resiliente y moderno pa stimula crecemento economico y contribui na seguridad di cuminda pa nos isla.
Den cuadro di transparencia y “Good Governance” Ministerio di Finansa, Asuntonan Economico y Sector Primario conhunto cu e compania a prepara un perfil pa e miembronan di e Hunta di Comisario di e compania. Esaki a keda aproba den Conseho di Minister.
Den e cuadro aki Gobierno di Aruba ta busca un miembro nobo pa e Hunta di Comisario di Aruba Agri Development Company N.V. E Hunta di Comisario tin como tarea pa controla y supervisa e directiva, como tambe asuntonan general di e maneho di e compania y alabes duna conseho na e directiva di e compania E vacatura ta publica den diferente medionan di comunicacion y e periodo pa aplica pa esaki ta cera dia 1 di november 2025. Por haya mas informacion di e vacatura riba rednan social di Minister Geoffrey Wever.
