Diabierna ultimo den un forma masal Aruba a acudi den nos caya principal Caya G.F. Betico Croes, desde Plaza Daniel Leo te cu Plaza Nikki Habibe y Plaza Comercio, unda cu Gobierno conhuntamente cu sector priva a organisa gran evenemento “Ban Bek Caya”. Hopi ta esnan cu a comenta di a sinti e nostalgia di tempo cu caya tabata vibrante y bibo.
Ultimo añanan pa diferente motibo e caya principal no a biba mas manera ela biba diabierna ultimo. Centenares di hende a bin disfruta di un anochi ameno cu musica, entretenimento, ambiente y por a probecha di hopi descuento y specials cu tabata tin den caya.
“Desde cu mi a haya e oportunidad pa bira minister, mi vision tabata pa revitalisa nos centro di ciudad como tambe esun di San Nicolas,” Minister Wever a cuminsa ta bisa, “Awe mi por mira cu ora traha den union por logra hopi. Mi kier a gradici nos Prome Minister Sr. Mike Eman y Minister di Turismo Sr. Wendrick Cecilia pa nan empeño pa por a logra esaki.. Poco poco nos lo trece e bida y vibracion cu Oranjestad merece.”
Desde inicio Minister Wever a cuminsa cu e proyectonan pa revitalisa Oranjestad. A cuminsa prome cu Plaza Comercio cu ta un plaza cu mas y mas ta haya su destino y unda diabierna hopi comerciante local a bende nan productonan local. A remodela parking lot dilanti Ex Brenchies pa crea mas espacio di parkeo. Casa Veneranda ta den pleno remodelacion y ta premira cu pa fin di 2025 lo keda ta cla. Ex edificio di OM lo ta pronto un studentenflat cu tambe lo bai trece mas hende den nos centro di cuidad. A renoba edificio unda awor AFTA ta situa, como tambe edificio di ex Interbank. Wilheminastraat ta drenta awor den su di tres fase di renobacion. Pronto lo cuminsa cu edificio di John E. Eman (ex Aruba Bank). Y awor cu e actividad manera “Ban Bek Caya” nos por mira cu e vision pa revitalisa e centro di Oranjestad ta bira un realidad.
Minister Wever un bes mas ta gradici tur esnan cu di un of otro manera a yuda pa por a logra ehecuta un actividad asina bunita den centro di ciudad. Awor cu esaki a tuma lugar, nos lo pasa bek cerca e comerciantenan pa asina nos haci un evaluacion di e impacto cu e actividad tabata tin pa nan y alabes pa ricibi nan comentario y sugerencia con pa haci e proximo “Ban Bek Caya” aun mas exitoso.
