Minister di Finansa, Asunto Economico y Sector Primario, Geoffrey Wever, ta informa cu CAft a duna un conseho positivo riba e presupuesto 2025, aproba unanimamente pa Parlamento riba 28 di maart 2025. E conseho di CAft ta confirma e direccion financiero prudente di Gabinete AVP-Futuro y alabes efectivo pa yuda cu poder di compra na Aruba.
CAft ta confirma cu Aruba su presupuesto 2025 ta cumpli cu e normanan financiero manera ancra den ley y ta nota positivamente cu hopi di e recomendacionnan anterior di CAft ta wordo sigui. Segun e conseho di CAft, e presupuesto di pais Aruba ta presenta un financieringsoverschot di Afl. 192 miyon, ekivalente na 2.4% di e bruto binnenlands product (BBP), cumpliendo asina cu e norma prescribi di un saldo positivo di minimo 1% di e sector colectivo.
Den su evaluacion, CAft ta resalta e importancia di sigui fortalece e maneho di gasto di personal y di formalisa un strategia structural pa reduccion di deuda externo, pa garantisa sostenibilidad financiero a largo plaso.
Minister Wever a indica: “Esaki ta un reafirmacion di e decisionnan cu nos a tuma den tur consideracion, pa un maneho di finansa publico cu ta responsabel y alabes efectivo: trahando disciplina pa crea espacio financiero pa yuda cu poder di compra.”
CAft su conseho positivo riba e presupuesto ta mustra cu:
- E aumento di reparatietoeslag di Afl. 250,- pa luna desde 1 di mei pa pensionadonan ta wordo implementa den un forma prudente y controla y ta recomenda pa haci un inkomenstoets;
- Overschotten di institucionnan manera AZV y SVB lo wordo uza pa reduccion efectivo di deuda.
Minister Wever a conclui: “Nos ta traha riba base di disciplina y un direccion cla pa un Aruba financieramente solido y fuerte. Mi ta gradici tur funcionario y instancia cu ta traha pa Aruba sigui progresa.” Ministerio di Finansa lo sigui mantene pueblo informa riba e desaroyonan principal den maneho di e finansa publico.
