Siman pasa Minister di Finansa Geoffrey Wever a entrega e presupuesto 2027 di Pais Aruba na College Aruba financieel toezicht (Caft) y diahuebs ultimo Caft, manera ancra den ley a duna su conseho riba e presupuesto 2027.
“Mi ta contento pa lesa cu e conseho di Caft riba e presupuesto 2027 ta uno positivo y cu ta reconoce e mehoracionnan cu nos a implementa desde cu Gabinete AVP-FUTURO a drenta den gobernacion. E conseho tambe ta contene algun recomendacion importante cu nos lo incorpora awo den e presupuesto 2027 pa asina nos por entrega un concepto di Presupuesto 2027 mas completo na Raad van Advies”, segun Minister Geoffrey Wever.
Segun CAft, Aruba ta presupuesta pa 2027 un surplus pa e sector collectivo di Afl. 203 miyon florin, cu ta representa 2,3 porciento di e Producto Interno Bruto. Den e cuadro financiero 2028- 2031, Aruba ta presupuesta un surplus anual di por lo menos 1,5 porciento di e Producto Interno Bruto. Cu e normanan presenta, e “ontwerp-begroting 2027” segun CAft pa awor ta cumpli cu e normanan presupuestario y reglanan di compensacion manera ancra den ley.
CAft ta señala tambe cu e Fondo General di Invercionn y Desaroyo (AIOF) ainda no ta activo. Aunke a inclui dotacionnan pa e fondo den e presupuesto, CAft ainda no a ricibi e presupuesto di AIOF ni e Agenda di Inversion. “Na e momento aki nos ta preparando pa finaliza e trayecto pa formalisa e promer presupuesto di AIOF, cu pronto lo jega Parlamento di Aruba pa por wordo trata”, segun Minister Wever.
Basa riba su evaluacion, CAft ta recomenda pa entrega e presupuesto di AIOF y e Agenda di Inversion, basa riba e prioridadnan di maneho y e capacidad di ehecucion di Pais Aruba. Ademas, CAft ta recomenda pa uza e ultimo definicion di e sector colectivo pa determina e saldo financiero y debe, y tambe pa determina e sector colectivo pa e periodo 2025- 2028.
Conseho di CAft riba e “ontwerp-begroting 2027” ta cay den liña di maneho financiero di Gabinete AVP-FUTURO. E presupuesto 2027 ta cumpli cu un saldo financiero di minimo 1 porciento pa e sector colectivo manera e Landsverordening Aruba Financieel Toezicht ta prescribi. Mescos cu presupuesto 2025 y e presupuesto 2026 Gabinete AVP-FUTURO ta cumpli cu e ley di supervision financiero.
Recomendacionnan di CAft ta hunga un rol importante den e proceso presupuestario di Pais Aruba y ta duna un contribucion valioso pa sigui mehora Aruba su finansa publico segun minister Geoffrey Wever.
E consehonan di CAft ta mustra cu Aruba ta sigui haci progreso den implementacion di e medidanan necesario. E consehonan ta confirma cu nos ta riba e caminda correcto, y hopi di e recomendacionnan ta caba ta den fase di implementacion , segun minister Geoffrey Wever.
