Minister di Finansa, Asunto Economico y Sector Primario, Geoffrey Wever, ta representando Aruba na Boneiro durante e conferencia anual di Dutch Caribbean Agriculture, Livestock, and Fisheries Alliance (DCALFA). E conferencia ta sirbi como un plataforma strategico pa fortalece cooperacion regional den sector agricola y pesca.
Delegacionnan di Aruba, Boneiro, Curacao, Saba, St. Eustatius, St. Maarten y Hulanda a bini hunto pa intercambia vision y conocemento, y traha riba solucionnan conhunto pa mehora seguridad di cuminda, sostenibilidad y desaroyo economico local den e islanan.
Desde cu e prome Memorandum of Understanding (MoU) a ser firma den juni 2023, e islanan a compromete pa stimula produccion local y reduci dependencia di importacion. Un parti importante di e evento di e aña aki ta e serie di tayer tecnico cu ta cubri temanan crucial manera:
- Pesca y maneho di recurso marino
- Seguridad alimenticio y autosuficiencia
- Control di plaga y malesa
- Rol di sector priva den desaroyo agricola
- Involucracion di hubentud den futuro agricola
“Conferencianan manera DCALFA ta crea un espacio real pa explora inversion y cooperacion cu lo beneficia nos tur,” Minister Wever a indica.
E vision cu Aruba ta sigui ta conecta directamente cu e implementacion di e Agri-Innovation Park. Un estudio amplio – realiza den colaboracion cu PRIVA, Santa Rosa, TWO-Aruba y Hulanda – ya su prome fase ta finalisa y lo sirbi como fundeshi pa e creacion di un hub moderno pa produccion y conocemento agricola na Aruba.
E Agri-Innovation Park lo ofrece infrastructura moderno y servicio logistico comparti pa agricultornan nobo y actual, elimina bareranan financiero y tecnico, y habri e sector pa posibilidad di participacion mas amplio. “Tur esaki ta pa fortifica nos resiliencia y diversifica nos economia den un manera sostenibel”, segun minister Geoffrey Wever.
