Diahuebs ultimo, Minister di Asunto Economico, Geoffrey Wever a reuni cu representantenan di e consultants Rebel y DeJong, cu a wordo busca pa Union Europeo pa yuda Aruba pa crea un cuadro regulatorio pa establece prijs di electricidad.
E minister di Asuntonan Economico tin e autoridad y ta responsabel pa stipula e prijs di electricidad na Aruba. Den e proceso pa stipula e prijs, actualmente no tin un organo pa conseha e minister riba e accionnan adecua pa tuma y esaki ta algo cu no ta bon. Prijs di electricidad ta afecta tur hende y compania na Aruba, y tin un impacto serio riba inflacion y pa e motibo ey ta importante pa e Minister di Asuntonan Economico ora tuma un decision pa hisa of baha e prijs di coriente tin un organo cu experiencia pa yuda e Minister tuma e mihor decision. E maneho energetico na Aruba ta responsabilidad di e Minister di Energia y e Minister di Economia ta responsable pa establece e prijs di coriente, y aki semper mester tin un cooperacion estrecho entre e ministerio di energía y e ministerio di economía. E consultants cu ta trahando riba esaki ta den dialogo cu diferente stakeholders manera WEB, Elmar, Ministerio di Energia, companianan priva etc.
Pa e motibo aki Minister Geoffrey Wever a aplica y a haya sosten di Union Europeo pa inicia un proyecto unda Aruba lo ricibi ayudo tecnico pa crea un cuadro huridico y tecnico regulatorio pa cu e prijs di coriente. E proyecto ta forma parti di e “GO Facility” di European Union. Un proyecto cu Minister Wever tin 2 aña trahando riba dje y awor ta concretisando.
“E proyecto tin como meta pa desaroya un cuadro huridico y regulatorio moderno pa por tin e capacidad di regula e prijs di electricidad na Aruba. Tur esaki basa riba principionan universalmente acepta manera prijsnan husto, transparente`y sin discriminacion. E mesun regulacion aki lo duna claridad na e consumidor y ta proteha interes di e pueblo Arubano, progreso real pa tur ciudadano y compania”, según Minister Geoffrey Wever.
