Durante su prome reunion na HUB Camara Santo Domingo 2026 cu representantenan di ProDominicana, Minister di Finansa, Asuntonan Economico y Sector Primario, Geoffrey Wever, a inicia conversacionnan concreto pa explora con Aruba por cuminsa importa carni for di Republica Dominicana y, na mes momento, structura un ruta comercial cu optimalisa esaki tanto logisticamente como economicamente pa nos isla.
Importacion di carni for di Republica Dominicana ta representa un oportunidad importante pa Aruba. Aruba por importa carni for di Republica Dominicana, pero importadornan Arubano no por cumpra carni di cualkier empresa. E carni mester bini di empresanan cu ta aproba y certifica, y cu ta cumpli cu tur e rekisitonan sanitario y veterinario aplica pa Aruba, incluyendo e rekisito di Departamento di Salud Publico y Servicio Veterinario.
Ta precisamente pa e motibo aki cu empresanan Arubano a participa na e mision na Republica Dominicana, pa por conoce y establece contacto directamente cu empresanan aproba cu por exporta carni pa Aruba. E meta ta pa crea e conexionnan comercial necesario, pa importadornan Arubano por cuminsa cumpra di e proveedornan aproba y, di e manera aki, habri e mercado pa mas producto di Republica Dominicana por yega Aruba.
E reunion no solamente a enfoca riba identifica companianan cu ta produci y exporta carni, pero tambe riba e condicionnan practico cu mester ta presente pa importacion por tuma luga na un costo competitivo. Un di e puntonan central ta e necesidad di genera suficiente volumen pa yena container regularmente, pasobra un ruta comercial ta bira sostenibel solamente ora tin suficiente volumen di producto y demanda pa mantene e costo di transporte bou control.
Den e cuadro ey, a papia riba e posibilidad pa envolve mas importadornan Arubano y identifica otro productonan Dominicano cu por wordo consolida den e mesun fluho comercial. E enfoke aki por yuda pa yena container di forma mas consistente, baha costo logistico y crea mas oportunidad pa comerciante y distribuidor na Aruba.
Pa Minister Wever, e reunion ta un prome paso importante den un proceso cu mester ta bon structura.
“Nos meta no ta solamente haya un proveedor nobo. Nos meta ta crea un ruta comercial cu por funciona den practica, cu tin suficiente volumen, cu ta competitivo y cu por duna nos importadornan mas opcion. Pa logra esey, mester alinea producto, empresa, logistica y institucionnan,” Minister Wever a indica.
Durante e conversacionnan, a identifica tambe e necesidad pa coordina cu diferente actor involucra den e cadena di importacion y exportacion. E prome reunion a habri e caminda pa sigui dialoga tocante un posibel Memorandum of Understanding (MOU) cu por reuni e partinan relevante y duna e cooperacion un base mas structura.
E posibel MOU lo no representa un contrato final di importacion, pero por sirbi como un instrumento pa organisa e siguiente pasonan, defini responsabilidad y facilita coordinacion entre empresanan, institucionnan y autoridadnan competente.
“Gobierno tin e responsabilidad pa crea e condicionnan pa negoshi por move. Esaki ta significa cu nos no ta limita nos mes na identifica un compania, pero nos ta mira henter e cadena: volumen, transporte, coordinacion, costo y continuidad. Esey ta con nos ta transforma un oportunidad den un ruta comercial real,” Minister Wever a enfatisa.
E enfokee pa importa carni for di Republica Dominicana ta forma parti di e maneho di Minister Wever pa diversifica fuentenan di abastecemento di Aruba, amplia opcionnan pa importadornan y reduci dependencia riba un cantidad limita di mercado.
Republica Dominicana ta un mercado regional importante cu tin produccion den diferente categoria alimenticio. Door di conecta empresanan Arubano directamente cu productor y exportador Dominicano, Aruba por explora alternativa nobo, crea mas competencia y fortalece su posicion den e cadena regional di suministro.
E prome reunion na HUB Camara Santo Domingo 2026 ta marca inicio di un proceso cu lo sigui cu contacto comercial, coordinacion tecnico y evaluacion di e condicionnan necesario pa haci importacion posible. Na e momento aki no tin un acuerdo final firma pa importacion di carni, pero e conversacionnan a establece un direccion concreto pa e siguiente fase.
“Nos a bin Santo Domingo pa busca resultado. E prome reunion a confirma cu tin oportunidad, pero tambe cu mester traha e structura corecto pa e oportunidad bira realidad. Nos lo sigui coordina e siguiente pasonan cu disciplina y cu un meta clar, crea mas opcion y un cadena di abastecemento mas fuerte pa Aruba,” Minister Wever a conclui.
Ministerio di Finansa, Asuntonan Economico y Sector Primario lo sigui informa comunidad tocante progreso di e reunionnan y e siguiente pasonan relaciona cu e posibel importacion di carni y otro productonan for di Republica Dominicana.
