Dialuna mainta durante un conferencia di prensa Minister di Finansa, Asunto Economico y Sector Primario, mr. Geoffrey Wever y Minister di Justicia y tambe Infrastructura, mr. Arthur Dowers, a inicia oficialmente e proyecto di revitalisacion di e centro di San Nicolas. E momento simbolico di ‘groundbreaking’ ta marca un paso concreto den e ehecucion di e vision di Gabinete AVP-Futuro pa trece bida, actividad economico y prosperidad bek den e centro di San Nicolas.
E ultimo dos añanan inister Geoffrey Wever a traha riba e proyecto pa renoba e area rond di Postkantoor, Setar y Arubus, y e plan completo ta consisti di ampliación di e trottoir, renoba e caminda, mas mata y tambe otro banda e construccion di un Farmers Market unda agricultornan por bende nan productonan y por bira un centro di encuentro pa nos ciudadanonan. E proyecto tambe lo encera e construcción di un speeltuin pa asina atrae mucha y mayor den e centro di San Nicolas. E promer fase a inicia awe cu ta e ampliación di e trottoir banda di Postkantoor y Setar, renobacion di e caminda y mas mata y e di dos fase cu ta encera e construccion di e Farmers Market, e speeltuin y embeyecemente di full e área ta den preparación pa inicia pronto. Cu e projecto di revitalización di e centro di San Nicolas cu a inicia awe, partidonan AVP y Futuro ta conecta proyectonan ehecuta bou di gabinete Eman I y II, manera e vierbaansweg, Carnaval Village, renobacion di Watertoren, Nicolaas Store etc. y ta demonstra e alineacion di e vision di Gabinete AVP-Futuro pa San Nicolas.
“E proyecto aki awe ta bira un realidad dor di cooperacion di hopi hende, entre otro ex Minister Ursell Arends kende tambe tabata parti di e preparacion di e proyecto aki y cu a duna su aporte pa awe e proyecto por bira un realidad, arkitecto Raffy Kock, full e equipo di DOW, Arubaanse Wegenbouw y San Nicolas Business Association”, segun Minister Geoffrey Wever.
“E renobacion di e centro San Nicolas no ta solamente un obra fisico, pero un renobacion di speransa pa un comunidad cu tin hopi pa ofrece. E pueblo di San Nicolas merece un ciudad vibrante y digno, esaki ta simplemente e inicio!” Minister Wever a expresa.
