Den cuadro di informa pueblo Minister di Finansa Geoffrey Wever a elabora riba ehecucion di e presupuesto 2025 pa e periodo juli pa september 2025. Cada kwartaal Departamento di Finansa ta compila e “UItvoeringsrapportage” basa riba cifranan preliminario di e administracion central di Pais Aruba y cifranan ricibi di entidadnan manera AZV, SVB, ATA, Serlimar, Stichting EPB y Universidad di Aruba cu ta forma parti di e sector colectivo.
Di januari pa september 2025, Aruba a ricibi 1.520 miyon florin na entrada cu ta 81% di e presupuesto 2025. Un total di 1.222 miyon florin ta e gastonan di Pais Aruba cu ta ekivalente na 68% di e presupuesto 2025. Aruba a paga 405 miyon na debe y un total di 194 miyon florin na interes den e periodo di januari pa september 2025.
Di e total na entrada ricibi, 521 miyon florin ta relata na Belasting Directo (34%), 664 miyon florin na Belasting Indirecto (44%) y e resto na diferente otro tipo di entrada. Si compara e entrada ricibi den januari pa september 2025 cu e mesun periodo den 2024, Belasting Directo ta mustra un crecemento di 8 miyon florin y Belasting Indirecto un crecemento di 50 miyon florin.
Entradanan di entre otro BBO y Invoerrechten den e periodo di januari pa september 2025 tambe ta mustra un crecemento compara cu e mesun periodo di 2024. Na BBO a ricibi un total di 323 miyon florin den januari pa september 2025. Esaki ta 27 miyon florin mas cu entradanan di BBO den den januari pa september 2024. Na Invoerrechten a ricibi un total di 188 miyon florin den januari pa september 2025. Esaki ta 20 miyon florin mas cu entradanan di Invoerrechten den den januari pa september 2024. Como indicadornan di crecemento economico, e crecemento den entradanan di BBO y Invoerrechten ta indica e desaroyo positivo di Aruba su economia y su impacto riba entradanan di gobierno.
Entradanan pa AZV, ATA y SVb den januari pa september 2025 tambe ta mustra un crecemento compara cu entradanan ricibi den januari pa september 2024. Den e prome tres kwartaalnan di 2025 entradanan pa AZV, ATA y SVb ta 823 miyon florin compara cu 770 miyon florin cu e mesun periodo den 2024. E subida di 53 miyon florin ta e resultado di e crecemento positivo di Aruba su economia.
Den e prome tres kwartaal di 2025, a realisa un totaal di 1.193 miyon na gasto. Di esaki, 377 miyon florin ta trata di entre otro gastonan di personal cu ta igual na 74% di e gastonan total riba presupuesto 2025 (509 miyon), 147 miyon na Goederen en Diensten cu ta igual na 68% di e gastonan total riba presupuesto 2025 (217 miyon) y 194 miyon na interes paga riba debenan di Pais Aruba cu ta igual na 64% di e gastonan total na interes riba presupuesto 2025 (301 miyon).
Manera ancra den ley, College Aruba Financieel Toezicht (CAft) mester haya e “uitvoeringsrapportage” den un termino di 6 siman. Minister di Finansa Geoffrey Wever ta anuncia cu Gobierno di Aruba a cumpli cu ley y a entrega e uitvoertingsrapportage pa kwartaal 3 di 2025 na tempo, manera cu tambe a entrega e uitvoertingsrapportage pa kwartaal 2.
Minister Geoffrey Wever ta gradici Departamento di Finansa pa e trabao di traha e uitvoeringsrapportage y entrega esaki manera ley ta bisa, na tempo na CAft. Den cuadro di transparencia y informacion. Parlamento di Aruba tambe a ricibi e uitvoeringsrapportage kwartaal 3 di 2025.
