Diahuebs mainta Minister Geoffrey Wever y delegacion di Aruba a sinta cu Minister di Agricultura, Crea di Bestia y Pisca di Surinam Sr. Parmanand Swedien.
Minister Wever: “Mi a splica con hunto cu Minister Arends di sector primario nos ta stimulando agricultura comercial na Aruba, entre otro dor di a incorpora e Agrifund, dor di organisa Agri Business Academy, dor di ta trahando riba e Agri Innovation Park y dor di ta haciendo estudionan riba e tereno di agricultura comercial investigando cua berdura ta mihor pa nos cultiva y cu ki tecnologia lo haci esaki”.
Topiconan di e combersacion tawata intercambio di personal di Santa Rosa y DEZHI di Aruba cu e departamento di agricultura y economia di Surinam pa un periodo pa asina tin intercambio directo di conocimento. Tambe a papia di e posibilidad pa studiantenan di EPI y Universidad di Aruba por haci un stage na Surinam pa wak con e agricultornan na Surinam ta opera. Un opcion interesante cu Surinam ta brinda ta tereno pa agricultornan di Aruba cultiva na Surinam pa exporta pa Aruba.
“Un oportunidad intersante ta pa match inversionistanan di Aruba cu ta busca oportunidad di inversion y agricultornan na Surinam cu tin conocimento di agriculta pero kizas no tin aceso na financiamento. Nos a palabra cu nos ta bai stimula e matchmaking aki”, según Minister Wever.
“E intercambio tawata sumamente interesante y nos a palabra cu e simannan nos dilanti nos lo bai traha riba un framework pa formalisa e intencionnan. Mi ta hopi enthousiasma pa cu e oportunidadnan aki cu Surinam por ofrece Aruba”, según Minister Geoffrey Wever.
