Minister Geoffrey Wever hunto cu DOW a completa un estudio extenso di mercado, unda a haci un inventario detaya di e flota di auto di Gobierno y di e opcionnan disponibel na Aruba pa remplasa esaki pa vehiculonan electrico. Na september 2024 a inicia cu e proceso y a cambia e autonan di lease den uzo na Departamento di Asunto Economico, Comercio y Industria (DAECI) y siman pasa SEDECO, otro departamento di gobierno pa haci e cambio pa auto electrico.
Awe orguyosamente por anuncia cu un otro entidad di gobierno, Post Aruba N.V., awe ta introduci su prome 5 autonan electrico. Gradualmente Post Aruba N.V. lo continua pa cambia su autonan pa autonan electrico. Asina aki Post Aruba N.V tambe ta aporta na e cuido di nos medio ambiente y reduci gasto operacional di e compania. Tur esaki ta parti di e plan y vision cu Minister Wever ta continua via e programa Green Overseas (GO) cu ta wordo financia pa Union Europeo (EU). Na 2024 e compania Expertise du France (EF) a wordo encarga pa eherce e proyecto aki cu tin como meta pa contribui na e desaroyo sostenibel, resiliente y inclusivo di e paisnan y teritorionan di EU y Reino Unido. Pa e trayecto aki, Union Europeo a aloca €190.000.
E meta ta pa acelera e transicion pa mobilidad electrico cu sosten tecnico di Europa. Union Europeo ta mira nos caso como un ehempel di uso eficiente di fondo di EU y lo usa nos como “case study” pa demostra con e tipo di fondo aki por contribui na desaroyo sostenibel den teritorionan Europeo pafo di Europa.
“Despues cu siman pasa SEDECO a continua cu e transicion pa autonan electrico, awe Post Aruba N.V. tambe ta tuma e paso aki cu introduccion di e prome 5 auotnan electrico den e fleta Algo cu nos por ta sumamente orguyoso di dje,” Minister Wever a bisa.
Minister Wever kier a gradici director nobo di Post Aruba N.V. sra. Esther Gomes cu tambe ta kere y mira e importancia di cambia nan fleta pa autonan electrico. Esaki no solamente lo yuda na baha gasto di pais Aruba y reduccion di gasto operacional, pero tambe lo reduci e impacto ambiental y asina promove un miho calidad di bida, protehando nos naturalesa y contribui na frena e cambio climatico.
