“Proyectonan di renobacion y revitalisacion di centro di Oranjestad manera e studentenflat y Cas Veneranda ta avansando den e direccion desea”, segun Minister Geoffrey Wever.
Revitalisacion di Oranjestad ta un prioridad pa Gabinete AVP-Futuro.
Ta remarcabel pa mira con e.o. e transformacion di e oficina bieuw di Ministerio Publico (Ex OM) ta progresando – un edificio cu pa hopi aña tabata abandona y na riesgo di bira ruina. Danki na e vision y colaboracion conhuntamente cu Fundacion Cas Pa Comunidad Arubano (FCCA) a ehecuta un plan pa rescata e edificio aki y dune un proposito nobo. Awe, nos por mira con e proyecto aki ta progresando cu e meta final pa crea vivienda pa studiante y asina yuda transforma nos centro. E proyecto aki ta parti di un strategia mas amplio y integral pa revitalisa e curason di Oranjestad, convertiendo espacionan bandona den centronan di oportunidad y desaroyo.
Cas Veneranda
Asina tambe por mira progreso significante den e proyecto di Cas Veneranda den Wilhelminastraat. Un hoya di edificio cu ta den pleno proceso di restauracion. Diabierna binidero lo tin su “spantenbier”, cual ta marca un otro etapa den e restauracion di e edificio, destina pa acomoda Directie Economische Zaken, Handel en Industrie.
Minister Wever ta subraya cu trece departamentonan di gobierno bek den centro ta crea un fluho diario di hende cu ta trafica den e area durante dia. Trafico cu tin su beneficionan pa e negoshinan den e area. E proyectonan aki ta piesa clave cu resultadonan tangibel den e plan integral pa revitalisa e centro di Oranjestad. Gabinete AVP-Futuro a pone revitalisacion di Oranjestad como prioridad den e acuerdo di gobernacion y lo sigui traha pa revitalisa e centro di Oranjestad.
