Minister di Finansa, Asunto Economico y Sector Primario, Geoffrey Wever, a tene su prome reunion oficial cu vertegenwoordiger di Algemene Rekenkamer Aruba (ARA), señora Croes-Williams (voorzitter) y señora de Jong-Curet (secretaris).

Tema principal tawata e preparacion di e jaarrekening 2021 di Land Aruba cu pronto lo wordo entrega na Algemene Rekenkamer Aruba y tambe e jaarrekeningnan di e añanan despues di 2021. “Nos ta comprometi pa percura cu e jaarrekeningnan di Land Aruba wordo prepara y integra segun ley y mi contento pa wak con tur instancia tin esaki como prioridad y ta trahando structuralmente pa trece mehoracion den maneho y control financiero di Land Aruba”, segun Minister Wever

Durante e encuentro, tabata trata tema relaciona cu transparencia financiero, control y supervision riba uzo di fondo publico. E reunion a sirbi como un momento di conocemento y pa afirma e compromiso comparti pa un maneho responsabel y integro di finansa publico.
Minister Wever a expresa su aprecio pa e rol independiente y critico cu ARA ta desplega den nos sistema democratico, y a subraya cu su ministerio ta dispuesto pa mantene un dialogo constructivo pa mehoracion continuo.