Minister di Finansa, Asunto Economico y Sector Primario, mr. Geoffrey Wever, ta anuncia un cambio importante den e “expatregeling” fiscal, cu tin como meta central pa stimula y facilita e regreso di profesionalnan Arubiano cu a studia y traha na exterior, pa nan por bin biba y contribui activamente na desaroyo di nan pais Aruba.
Pa hopi aña, e “expatregeling” fiscal a wordo aplica principalmente pa expertonan cu ta bin di afo, cu un salario minimo di Afl. 150.000 y cu experticio cu no ta disponibel riba e mercado laboral local. Cu e reforma nobo, gobierno ta tuma un paso consciente pa amplia e alcance di e areglo, asina cu e lo ta aplicabel tambe pa profesionalnan cu un formacion academico minimo di HBO y cu al menos cinco aña di experencia relevante.
Segun Minister Wever, e adaptacion aki ta responde directamente na un realidad claro: hopi Arubiano cu a crece na Aruba, cu a sigui nan estudio den exterior y cu a traha y haya experencia internacional, kier bin cas bek, pero te awor a haya poco condicion fiscal cu tabata haci esaki atractivo. “Cu e cambio aki nos ta crea un manera concreto pa nos yuinan di tera bin bek, traha, inverti y construi nan futuro na Aruba,” segun minister Geoffrey Wever.
E “expatregeling” reforma no ta solamente un incentivo fiscal, pero un instrumento di politica laboral cu ta reconoce e balor di capital humano Arubiano. Door di facilita e transicion pa e regreso di talento local, gobierno ta apunta pa fortifica conocemento local, productividad y liderazgo profesional den sector publico y priva.
Ademas di amplia e doelgroep, e reforma tambe ta modernisa e tratamento fiscal di condicionnan secundario laboral, pa cu e regeling ta mas alinea cu e mercado laboral actual. Esaki ta inclui actualisacion di sumanan existente y introduccion di facilidad fiscal nobo riba transporte, vivienda, comunicacion, bienestar y desaroyo profesional. Den e contexto aki, e estimulo pa uso di vehiculo electrico y hybrid ta contribui no solamente na mobilidad, pero tambe na sostenibilidad.
Minister Wever ta subraya cu e reforma di e “expatregeling” ta parti di un vision mas amplio pa prepara Aruba pa futuro, caminda talento local ta wordo reteni y reintegra activamente den nos economia. “Si nos kier un economia fuerte y resiliente, nos mester inverti den nos propio hende,” minister Wever a expresa.
E cambio di e “expatregeling” fiscal a drenta na vigor riba 1 di januari 2026, marcando un paso importante den e esfuerso continuo pa fortifica e mercado laboral y crea mas oportunidad pa profesionalnan Arubiano. E “expatregeling” ta publica riba https://www.gobierno.aw/nl/afkondigingsbladen-2025.
