Minister di Finansa, Asunto Economico y Sector Primario Geoffrey Wever ta informa cu e “Staff Concluding Statement of the 2025 Article IV Mission” di International Monetary Fund (“IMF”) ta disponibel riba IMF su website. Esaki ta encera e analisis di IMF riba desaroyo actual y den futuro riba tereno financiero, economico y monetario den cuadro di nan bishita den e periodo di 23 di september pa 6 di october na Aruba.
Segun IMF e rebound fuerte di turismo y inversionnan den proyectonan hotelero ta factornan determinante pa e recuperacion economico. E producto interno bruto den termino real a crece cu 10.6 porciento den 2022, sigui pa un crecemento premira di 8.9 porciento den 2023 y 7.6 porciento den 2024. Inflacion a baha di 7.7 porciento den augustus 2022 pa -0.8 porciento den augustus 2025 como resultado di prijsnan mas abao pa cuminda y energia. E tasa di desempleo a cay na 4.3 porciento den 2024, un refleho di e demanda fuerte pa trabou. E balansa di pago a mehora di un deficit di 17.2 porciento di e producto interno bruto pa un surplus di 9.3 porciento den 2024. Reservanan internacional ta keda na un nivel saludabel cu 7.9 luna di importacion, y un sector bancario fuerte.
E recuperacion fuerte economico den combinacion cu disciplina presupuestario ancra den ley di supervision ta factornan pa surplus di 3.0 porciento den 2023 y 3.7 porciento den 2024. E debe di Pais Aruba a baha di 116.3 porciento di producto interno bruto den 2020 pa 68.6 porciento na final di 2024. Pa 2025 y 2026 IMF ta premira cu ambos presupuesto lo cumpli cu normanan presupuestario manera ancra den ley y yega na un debe di gobierno di 50.4 porciento di producto interno bruto den 2030. IMF te recomenda entre otro pa mas eficiencia den maneho di gastonan operacional y crea fuentenan nobo di entradanan pa reduccion duradero di e nivel di debe di gobierno. IMF ta indica cu e Rijkswet di supervision financiero lo fortalece reglanan fiscal.
Pa mitiga riesgonan manera entre otoro tension geopolitico, incertidumbre prolonga riba crecemento economico pa escalacion di e “trade war”, riesgonan climatico y atraso den ehecucion di inversionnan publico, IMF ta recomenda un bon coordinacion y planificacion entre departamentonan di gobierno pa proteha stabilidad macroeconomico y gruponan vulnerabel. IMF ta aplaudi cu Aruba a bira miembro di e “Coalition of Finance Ministers for Climate Action”.
Banda di turismo como sector economico, IMF ta recomenda pa pusha e desaroyo di entre otro sectornan manera agricultura, economia circular, industria creativo, y transicion energetico. Mehora infrastructura y clima di negoshi ta esencial pa mobliza inversionnan di sector priva y apoya e industria turistico y diversificacion.
“International Monetary Fund ta un organisacion internacional cu ta evalua e desaroyo di nos pais continuamente y ta importante pa un y tur tin acceso na publicacion di e organisacion imporante aki. Tur interesa por bishita e websita di IMF pa e relato “Staff Concluding Statement of the 2025 Article IV Mission”, segun Minister di Finansa, Asunto Economico y Sector Primario Geoffrey Wever.
