Diadomingo ultimo districto di Savaneta a conoce su prome Seafood Festival. Un evento como parti di e cooperacion entre gobierno di Aruba y Fundacion Savaneta Prome Capital cu tabata un exito rotundo y bishita masalmente. Como parti di su maneho pa e sector di pesca, Minister di Finansa, Asunto Economico y Sector Primario, mr. Geoffrey Wever a firma e “Uitvoeringsovereenkomst” cu e compania cu a gana e destaho pa renobacion y mantencion di e pier di ex-Brisas del Mar na Savaneta. “Pronto e pier di ex-Brisas del Mar lo ta completamente renova, pa uso pa nos piscadornan y tur habitante di Savaneta”, segun Minister Wever.
Mantencion y renobacion di piernan rond di Aruba ta prioridad pa desaroyo di e sector di pesca. Pa duna contenido concreto na e vision y maneho di gobierno di Aruba pa sector di pesco manera palabra den Programa di Gobernacion AVP-FUTURO 2025-2028, minister Geoffrey Wever a percura pa aloca 500 mil florin pa renobacion di piernan pa nos piscadornan, cuminsando cu e pier di ex-Brisas del Mar na Savaneta y e pier den Colony na Rodgers Beach.
“Infrastructura basico y adecua ta un fundamento necesario pa crecemento y desaroyo di e sector di Pesca. Banda di facilita cu nos piscadornan tin e infrastructura necesario, comunidad henter, vooral muchanan, ta tambe por haci uzo continua di e piernan aki pa disfruta di nan tempo liber na lama”, segun minister Geoffrey Wever.
