Savaneta a biba diadomingo ultimo durante un exitoso segundo edicion di Savaneta Seafood Festival. Hendenan for di diferente parti di Aruba a yega Savaneta pa disfruta di seafood, gastronomia, musica, cultura y un ambiente familiar, convirtiendo e festival den un verdadero encuentro di comunidad y un plataforma pa actividad economico local.
Loke a cuminsa na 2025 como un iniciativa di Fundacion Savaneta Prome Capital pa pone pesca y identidad di Savaneta mas den luz, ta creciendo den un evento cu ta reuni piscadonan, comerciante, emprendedornan, artesanonan, famianan y bishitantenan for di henter Aruba.
E crecemento aki ta resultado di confianza y colaboracion. Ministerio di Finansa, Asunto Economico y Sector Primario, bou di responsabilidad di Minister Geoffrey Wever, a sostene e iniciativa desde su prome edicion cu e conviccion cu Savaneta Seafood Festival por bira un plataforma duradero pa fortalece comunidad y, na mes momento, crea oportunidad economico rond di pesca y producto local.
“Loke nos a mira na Savaneta ta exactamente loke nos kier logra, un comunidad cu ta bini hunto, nos piscadonan y empresarionan cu ta haya un plataforma, producto local cu ta haya visibilidad y actividad economico cu ta keda den comunidad. Mi ta sumamente contento di mira con Savaneta a brasa e iniciativa aki y con hendenan for di tur parti di Aruba a bini pa forma parti di dje. Esaki ta duna nos mas motivacion pa sigui inverti den e festival y traha pa hacie mas grandi y mihor,” Minister Geoffrey Wever a declara.
Savaneta Seafood Festival ta mustra cu inversion den sector primario por tin un efecto cu ta bay mas leu cu pesca solamente. Ora un piscador por presenta su producto, un empresario por bende su cuminda, un artesano por ofrece su producto y cientos di bishitante ta yega den un comunidad, actividad economico ta wordo genera directamente na nivel local.
E vision di Sr. Norman Thijsen y su team di Fundacion Savaneta Prome Capital conhuntamente cu Minister Geoffrewey Wever, ta pa fortalece e cadena completo, for di piscamento y producto local, te na gastronomia, comercio y experencia cultural.
Esaki ta cuadra cu e direccion stipula den Programa di Gobernacion AVP-FUTURO 2025-2028, cu pa sector primario ta pone enfoke riba contribui na seguridad alimentario y desaroya un sector resistente y robusto, incluyendo stimulacion di pesca na Aruba. Den e mesun contexto, Gobierno ta mira oportunidad pa promove producto local, fortalece iniciativa empresarial y crea mas actividad economico alrededor di sector primario.
Savaneta Seafood Festival ta un expresion concreto di e maneho ey: no solamente papia di fortalece sector primario, sino crea espacionan unda e sector por conecta directamente cu consumidor, empresario y comunidad.
E festival tambe ta forma parti di un vision mas amplio pa pesca. Inversion den infrastructura pa piscadonan, promocion di producto local y iniciativanan pa pasa conocemento di pesca na generacion siguiente ta contribui na un mesun meta, cula ta, duna pesca local un posicion mas fuerte den futuro economico di Aruba.
E exito di e festival no ta keda refleha solamente den actividad economico. E cantidad y diversidad di bishitantenan a mustra algo igualmente importante, Savaneta Seafood Festival ta creando un espacio unda comunidadnan ta topa cu otro.
Famianan y bishitantenan for di diferente parti di Aruba a reuni na Savaneta, mientras e comunidad di Savaneta mes a haya oportunidad pa presenta su tradicion, gastronomia y identidad na un publico mas amplio. Esaki ta fortalece e conexion entre pesca y e identidad historico di Savaneta, mientras ta crea un experencia cu por sigui atrae mas hende cada aña.
“Nos no kier organisa solamente un evento grandi. Nos kier construi algo cu Savaneta por sinti ta parti di dje; algo cu nos piscadonan y comerciantenan por conta riba dje cada aña y cu pueblo di Aruba ta identifica cu ne. E segundo edicion a mustra cu e fundeshi ta fuerte. Awor nos compromiso ta pa sigui construi riba dje y haci cada siguiente edicion mas grandi, mihor y cu mas oportunidad pa comunidad.”
Minister Wever ta expresa un gradecimento special na Sr. Norman Thijsen y su team di Fundacion Savaneta Prome Capital, na tur partner publico y priva, y especialmente na cada piscador, vendor, empresario, artesano y participante cu a pone nan confianza den e iniciativa. Nan participacion y compromiso desde e prome edicion a yuda transforma e vision inicial den un festival cu awe ta creciendo como un tradicion nobo pa Savaneta.
Minister Wever tambe ta gradici cada persona cu a bishita e festival. E presencia di hendenan y famianan for di tur parti di Aruba ta un señal importante cu tin interes pa producto local, pa pesca, pa cultura y pa actividadnan cu ta trece nos comunidadnan hunto.
Ministerio di Finansa, Asunto Economico y Sector Primario lo sigui sostene e desaroyo di Savaneta Seafood Festival, hunto cu su comunidad y su partnernan, cu e ambicion pa cada edicion crea mas oportunidad economico, duna mas espacio na producto local y fortalece Savaneta como capital di pesca di Aruba.
Un festival cu a nace for di pesca y tradicion ta creciendo den algo mas grandi pa bira un inversion den comunidad, den economia local y den futuro di sector primario di Aruba.
