Durante apertura oficial di Aña Parlamentario 2026–2027, Gobernador di Aruba a presenta e rumbo di Gobierno pa e periodo venidero, cu un enfoke riba bienestar general, finansa publico sano, un economia mas amplio y inversionnan concreto cu ciudadano por sinti den su bida diario. E direccion presenta ta pone stabilidad financiero, diversificacion economico y inversion publico den un solo vision di desaroyo: crea oportunidad y prosperidad comparti pa henter comunidad.
Gobierno ta sali for di e principio cu bienestar general ta rekeri un fundeshi financiero solido. Un finansa publico sano no ta un meta riba su mes, sino e condicion cu ta crea espacio pa por sigui inverti den e hendenan y den futuro di Aruba. P’esey Gobierno lo continua cu un maneho financiero prudente, uzo responsabel di recursonan publico y un fortalecemento continuo di transparencia den preparacion y ehecucion di presupuesto.
Introduccion gradual di preparacion di presupuesto basa riba maneho lo permiti Gobierno conecta metanan di maneho mas directamente cu recursonan disponibel y cu resultadonan cu mester wordo logra. Mas uzo di dato lo contribui na decisionnan mihor fundamenta y na un maneho publico unda cada florin tin un proposito claro y cada inversion ta conecta cu un prioridad concreto.
E fortaleza economico cu Aruba a mustra den e periodo cu a pasa ta crea tambe e responsabilidad pa sigui amplia e base economico di pais. Gobierno lo continua crea oportunidad den agricultura, tecnologia financiero, economia blou, industria creativo, energia limpi y otro actividadnan nobo. E meta ta fortalece un economia mas diversifica y resistente, cu mas espacio pa actividad productivo, inversion, innovacion y participacion local.
Turismo lo sigui hunga un rol esencial den economia di Aruba, pero e direccion ta pa un desaroyo sostenibel y den balansa cu capacidad y aspiracionnan di nos isla. Calidad, sostenibilidad, participacion local y calidad di bida lo sigui forma parti central di e maneho economico. E progreso economico mester yega mas directamente cerca e ciudadano y crea oportunidad y prosperidad cu por wordo sinti den cada cas y den cada bario.
Un otro paso importante den e direccion aki ta Fondo di Inversion. Cu aprobacion di e ley pa crea e Fondo, Gobierno a establece e base legal pa pasa di planificacion pa ehecucion di inversionnan publico importante. Den e Aña Parlamentario 2026–2027, Parlamento lo trata e prome presupuesto di Fondo di Inversion, creando asina e siguiente paso pa canalisa recursonan pa proyectonan cu ta contribui directamente na calidad di bida y desaroyo di e pais.
Gobierno tin intencion di presenta inversionnan cu ta encera, entre otro, MFA na San Nicolas, mehoracion di bario, renobacion di scol y monumento, reforestacion y embeyecimento di centronan di Oranjestad y San Nicolas. E obhetivo ta pa e resultado di maneho financiero sano no keda solamente den cifranan, sino bira visibel den infrastructura, espacio publico y facilidadnan cu comunidad por mira, uza y sinti den su bida diario.
E rumbo pa e periodo venidero ta basa riba continuacion pa crea un conexion directo entre bon maneho financiero, fortaleza economico y progreso social. Stabilidad ta crea espacio pa inversion, inversion ta fortalece economia y un economia mas fuerte mester crea mas oportunidad y bienestar pa pueblo.
Desde Ministerio di Finansa, Asunto Economico y Sector Primario, Minister Geoffrey Wever lo sigui contribui na ehecucion di e prioridadnan aki dentro di e vision integral di Gobierno. E enfoke principal ta keda riba consolidacion di finansa publico sano, ampliacion di e base economico, fortalecemento di sector primario y creacion di condicionnan pa inversionnan cu ta contribui na un Aruba mas fuerte, mas stabiel y mihor prepara pa futuro.
