Diamars atardi Minister di Finansa, Asunto Economico y Sector Primario, Geoffrey Wever hunto cu e director di Aruba Agriculture Development Company N.V. (AADC), sr. Jeremy Croes a presenta e desaroyonan di Aruba Agriculture Development Company N.V. (AADC) den un presentacion oficial na Parlamento. E empresa estatal, cu ta 100% propiedad di Gobierno di Aruba, a bira operacional na maart 2024 como un instrumento clave pa realisa e mision nacional di stimula agricultura, diversifica economia y garantisa seguridad di cuminda pa pueblo di Aruba.
“E creacion di AADC no ta solamente un paso strategico, pero un compromiso firme cu futuro di Aruba. Nos a tuma e prome paso pa un sistema agricola comercial cu ta innovativo y sostenibel,” segun Minister Wever.
AADC: Un base pa crecimiento estructural den sector agricola
E Aruba Agriculture Development Company N.V.(AADC) tin como mision pa desaroya un pilar economico fuerte y resiliente riba nos isla, cu enfoke riba produccion local, uso di tecnologia, y sostenibilidad. Den su strategia ta inclui:
- Inversion den infrastructura y tecnologia moderno pa cultibo den kas.
- Fortalecimento di capacidad local via formacion y asesoramento strategico.
- Sosten financiero via microprestamo
- Construccion di un parke di innovacion agricola cu centro di excelencia.
AADC ta opera na manera autonomo, bou di liderazgoo di director sr.Jeremy Croes. E empresa ta traha den colaboracion cu entidadnan gubernamental manera DEZHI y Santa Rosa, y tambe cu partnernan priva manera Qredits Aruba y instituto di conocimiento manera Priva.
