Gobierno di Aruba, por medio di e Minister di Finansa, Asunto Economico y Sector Primario, mr. Geoffrey Wever, ta representa nos pais oficialmente den e Fall Meetings 2025 di e Fondo Monetario Internacional (IMF) y e World Bank Group (WBG), cu lo tuma lugar for di 13 te 18 october na Washington D.C.
E siman di reunionnan ta un oportunidad crucial pa Aruba pa fortifica su posicion internacional y pa intercambia conocimento y experiencia cu paisnan y institucionnan global riba tema di maneho financiero, stabilidad economico y desaroyo sostenibel. Den e reunionnan aki ta participa ministernan di finansa, directornan di banconan central, lidernan di sector priva y representantenan di organisacionnan multilateral.
Aruba lo participa den diferente reunion riba e topico di cambio di clima. Aruba recientemente a bira miembro number 99 di e Coalicion di Finance Minister on Climate Action, un logro cu ta subraya e compromiso di Gobierno di Aruba pa tuma parti den e combersacionnan internacional riba e tema crucial di cambio climatico y resiliencia economico.
“Cambio climatico no ta un menasa cu ta leu di nos. E ta real y lo tin efecto directo riba un pais chikito manera Aruba. Nos ta depende di turismo, y nos playanan y nos costa ta nos asset mas importante. Si nivel di lama subi, nos tin cu ta prepara na tempo pa contrarresta esaki. Pa esey, ta esencial pa Aruba ta presente na e mesa global di combersacionnan, negociacionnan y cooperacion,” Minister Wever a bisa.
Enfoke riba colaboracion y financiamento sostenibel
Durante e Fall Meetings, e delegacion di Aruba lo tin reunionnan cu IMF, World Bank y partnernan multilateral, asina cu varios “think tank” internacional manera e World Resources Institute (WRI), Climate Policy Initiative, y e Grantham Institute di London School of Economics, y cu representante di e Bridgetown Initiative di Premier Mia Mottley di Barbados.
E topiconan lo inclui con Aruba por accede fondo pa financiamento climatico y fortifica su cuadro nacional pa adaptacion y mitigacion di riesgo climatico.
Minister Wever a enfatisa cu “Lo no ta suficiente pa reconoce e riesgo; nos mester actua na tempo, planifica financieramente y busca cooperacion tecnico cu e institucionnan cu tin e experiencia y e manera pa asisti paisnan chikito manera nos.”
Reforsando e base economico y financiero di Aruba
E participacion di Aruba den e Fall Meetings ta sigui despues di e Article IV Mission reciente di IMF na Aruba, cu a evalua nos situacion economico y financiero.
Durante e mision ey, IMF a papia cu casi 60 stakeholder y a evalua positivamente e direccion di nos pais, manera por ehempel, e crecemento economico sostenibel ta continua, e maneho di finansa publico ta fortifica y Gobierno ta tuma decisionnan strategico pa proteha poder di compra di ciudadano y pa mehora transparencia y base di dato pa decisionnan di gobernacion.
“Nos a traha duro pa establece un base financiero solido. IMF a reconoce e progreso di Aruba den su maneho financiero y e direccion strategico cu nos a tuma. Participa na foronan internacional manera IMF y World Bank ta esencial pa sigui fortalece nos posicion y prepara nos pais pa futuro,” minister Wever a splica.
