Riba 29 di augustus e presupuesto 2026 a wordo entrega na Parlamento. Cu esaki Gabinete AVP-FUTURO ta cumpli pa den un periodo di 5 luna entrega un presupuesto na tempo, cu (1) ta contene un surplus, (2) contene espacio financiero pa mehora poder di compra y (3) ta contene espacio financiero pa inversion den ensenanza, infrastructura, deporte .
E proceso di presupuesto ta consisti di tres fase. E prome fase ta cana di januari pa juni den cual ta fiha e prioridadnan di maneho cu input ricibi di tur ministerionan. Basa riba e Meibrief cu ta conteno diferente opcionnan compila pa Departamento di Finansa, Ministerraad ta determina loke lo bira e cuadro financiero y prioridadnan. Basa riba esaki ta traha e concepto di e presupuesto. Riba 11 di juni 2025 Minister di Finansa a manda e “ontwerp-begroting 2026” pa College Aruba financieel toezicht (CAft) pa conseho. Riba 25 di juni gobierno a ricibi e conseho di CAft riba e “ontwerp-begroting 2026”.
Conforme constitucion di Aruba fase dos ta inicia cu entrega riba 22 di juli na Raad van Advies di e “ontwerp-begroting 2026” cu ta inclui tambe e reaccion di gobierno riba e conseho di CAft. Basa riba e conseho di Raad van Advies ricibi riba 13 di augustus, gobierno ta traha riba su reaccion of “Nader Rapport”. E “Nader Rapport” ta e ultimo stap prome cu entrega e presupuesto 2026 na Parlamento. Gabinete AVP-FUTURO a entrega riba 29 di augustus e presupuesto 2026 na Parlamento, na tempo y conforme ley. Fase tres ta encera e tratamento di e presupuesto pa Parlamento.
Ta importante pa reitera cu e presupuesto ta un ley cu gobierno ta presenta na Parlamento. Esaki ta implica cu tin terminonan ya determina pa ley. Pa por logra esaki, den cada fase e decisionnan riba nivel ministerial mester wordo tuma na tempo y bon coordinacion entre departamentonan pa no tin retrazo den esaki.
Minister Geoffrey Wever ta gradici coleganan ministernan, ministerionan y Departamento di Finansa y Departamento di Asunto Legal y Huridico pa e bon cooperacion y coordinacion pa logra entrega riba 29 di augustus 2025 e presupuesto 2026, na tempo y cu ta cumpli cu ley, cinco luna despues di a huramenta riba 28 di maart 2025.
