Cu Plaza Lolita yen di bishitante, famia, comerciantenan, artesanonan y productor local, San Nicolas Pop-Up Market a celebra su prome aniversario diasabra ultimo den un ambiente yen di alegria, musica, sabor y energia positivo. E celebracion exitoso ta marca un aña di crecemento di un iniciativa cu a cuminsa chikito cu 13 vendors y artesanonan local, pero cu awe a cu apoyo di gobierno a crece y bira un punto di encuentro importante pa comunidad y un plataforma pa actividad economico den centro di San Nicolas.
For di su prome edicion na september 2025, e vision di Minister di Finansa, Asunto Economico y Sector Primario, Geoffrey Wever, tabata pa duna e mercado cu ya tabata existente caba un empuhe y pa crea algo mas cu solamente un evento mensual. E meta tabata pa crea un espacio accesibel y recurrente unda comerciantenan chikito, artesanonan y productornan local por haya oportunidad pa presenta y bende nan producto, conecta cu cliente nobo y crece.
E iniciativa a cuminsa cu apenas 13 comerciante, entrenan vendors y artesanonan. Ya pa su di tres edicion na november 2025, e mercado tabata conta cu mas di 45 vendors y artesano local, un indicacion di e confianza cu e concepto tabata generando entre comerciantenan y comunidad. Gobierno a indica na e momento ey cu e mercado ta stimula economia local, ofrece un plataforma na empresarionan y productornan local y forma parti di e trayectoria di revitalisacion di San Nicolas.
Pa Minister Wever, e crecemento di e Pop-Up Market no por wordo midi solamente den cantidad di comerciante. Su balor principal ta den e comunidad cu a forma rond di e iniciativa.
Cada luna, comerciantenan y artesanonan ta prepara nan producto, famianan ta bishita Plaza Lolita y hende for di diferente parti di Aruba ta yega San Nicolas pa pasa un rato, come, cumpra y sostene productornan local. E resultado ta un actividad cu ta genera movemento den centro di San Nicolas y, na mes momento, ta crea conexion entre comerciante y consumidor.
Minister Wever ta gradici specialmente tur e vendornan, artesanonan, productornan y otro participantenan cu durante e ultimo aña a pone nan confianza den e iniciativa.
“Sin nan confianza, compromiso y perseverancia, San Nicolas Pop-Up Market no lo por a bira loke e ta awe. Cada vendor cu ta instala su stand, cada artesano cu ta presenta su trabou y cada productor cu ta trece su producto ta contribui na algo mas grandi, un comunidad comercial cu ta creciendo den centro di San Nicolas.”
Desde inicio, Minister Wever a opta pa sostene e Pop-Up Market como un iniciativa mensual. E filosofia tras di e inversion continuo ta cu Gobierno por facilita e espacio y crea condicionnan pa actividad economico, pero ta e comerciante, productor y comunidad ta esnan cu finalmente ta duna e iniciativa bida.
“Nos a kere den e concepto desde principio y nos a sigui sostene e cada luna. No solamente pa organisa un evento, sino pa crea oportunidad. Ora un comerciante chikito haya un lugar pa bende su producto, haya un cliente nobo of crea un conexion cu por yuda su negoshi crece, e inversion ta cumpliendo su proposito,” minister Wever a indica.
E vision ta alinea directamente cu e trayectoria mas amplio di revitalisacion di San Nicolas. Gobierno ta combina inversion den infrastructura y espacio publico cu promocion di desaroyo economico local, turismo y comercio. E plan di revitalisacion ta inclui tambe un mercado como parti di e desaroyo di e area.
E direccion ta cuadra cu lo cual a keda acorda den e Programa di Gobernacion AVP-FUTURO 2025-2028, cu ta establece e rumbo di Gobierno pa e periodo actual. Den implementacion di e programa, Gobierno a identifica revitalisacion di centro di San Nicolas, promocion di actividad economico local y creacion di un clima cu facilita iniciativa priva como elementonan importante di su maneho. Gobierno tambe a introduci incentivonan fiscal pa stimula inversion den centro di San Nicolas y Oranjestad.
Pa Minister Wever, revitalisacion no ta limita na drecha infrastructura of renoba edificionan. Un centro di ciudad mester tin hende, actividad, comercio y oportunidad.
E Pop-Up Market ta pone e principio ey den practica. Cada edicion ta crea un motibo adicional pa bishita San Nicolas y ta ofrece comerciantenan chikito un plataforma concreto pa participa den e actividad economico cu e revitalisacion ta busca pa genera.
Cu e prome aniversario celebra exitosamente, Minister Geoffrey Wever su compromiso ta pa sigui fortalece, profesionalisa y haci San Nicolas Pop-Up Market mas grandi y mihor.
“Un aña pasa nos tabatin un idea y un vision. Awe nos tin un comunidad cu ta kere den e iniciativa. E siguiente paso ta pa sigui construi riba e confianza ey. Nos kier un Pop-Up Market cu ta sigui crece, cu ta crea mas oportunidad pa nos comerciantenan y cu ta trece cada biaha mas hende den centro di San Nicolas,” Minister Wever a expresa.
Minister Geoffrey Wever ta felicita y gradici tur vendor, artesano, productor, participante, partner y bishitante cu a contribui na e prome aña di San Nicolas Pop-Up Market.
