Pa prome biaha den 14 aña, Aruba lo importa bestia nobo pa cria, introduciendo genetica nobo cu lo contribui na fortalecemento di cria local y na un produccion mas sostenibel pa nos comunidad. Den preparacion pa e yegada di e bestianan nobo, Santa Rosa lo bende parti di su bestianan existente den un loting cu lo tuma luga otro siman.
Den preparacion pa yegada di e bestianan nobo, Directie Landbouw, Veeteelt, Visserij en Markthallen (DLVV), miho conoci como Santa Rosa, ta habri oportunidad pa criadornan local cumpra parti di e bestianan existente. E bestianan cu actualmente ta wordo ofreci pa benta ta porco y padrotnan di cabrito jong-adulto y adulto. E plan di DLVV ta stipula cu e porconan existente y un grupo selecta di cabrito macho lo wordo bendi, mientras cu un grupo selecta di bestia lo keda pa forma parti di e programa di cria renoba.
E Minister di Finansa, Economia y Sector Primario, Geoffrey Wever, ta invita tur criador interesa y registra na Santa Rosa pa tuma contacto cu DLVV e siman aki, indica nan interes y registra pa e loting cu lo tuma luga otro siman.
Segun e procedimiento estableci, cada comprador por cumpra un maximo di dos bestia; e bestia selecta ta wordo pisa, pago ta tuma luga na caha di DLVV y e comprador ta responsabel pa transporte.
Pa por cumpra bestia di DLVV, e interesado mester ta registra como agricultor y/of criador na DLVV-Santa Rosa y cumpli cu e condicionnan estableci pa tene bestia.
Criadornan interesa por tuma contacto cu Santa Rosa na 585-8102 y puntra pa Sr. Edward Berben of Sra. Carola Geerman pa mas informacion tocante e benta y e proceso di loting, cu lo tuma luga otro siman.
Den curso di otro siman, Minister Wever lo comparti mas informacion tocante e importacion di e bestianan nobo, e genetica nobo y e beneficio cu esaki lo trece pa sector primario di Aruba. Esaki ta stapnan concrete pa fortelece e sector primario pa e bienesta di pais Aruba.
