Den marco di su bishita oficial na Hulanda, Minister Gerlien Croes, a participa den un encuentro inspirativo cu e hobennan studiante Arubiano na Hulanda. E evento, un ‘Meet & Greet’ organisa conhuntamente cu Arubahuis, a tuma luga na De Haagse Hogeschool na Den Haag y a resulta den un participacion record di studiantenan motiva y comprometi. E cantidad record di studiante cu a atende e ‘Meet & Greet’ ta confirma e interes, motivacion y speransa di e studiantenan pa un maneho, esfuerso y vision alcansabel colectivamente.
E encuentro a sa di crea espacio pa dialogo abierto y interactivo riba topiconan relevante manera: diferente ramo di estudio, vivienda, seguro, mentorado, sosten y reto cu studiantenan Arubiano ta enfrenta durante nan trayectorio academico y personal na Hulanda. Otro topiconan cu a dialoga riba dje tabata: falta di informacion general encuanto preparacion pa bay studia na Hulanda, bida na Hulanda y incentivanan pa bin bek Aruba. E energia positivo y e nivel di participacion a resalta e gran compromiso cu e hoben Arubiano tin pa su futuro y pa e desaroyo di nos pais.
Minister Croes a destaca cu Aruba ta conta riba su studiantenan pa termina nan estudio exitosamente y cu su regreso y aporte ta esencial pa un Aruba progresivo, fuerte y yena di oportunidad. “Nos ta kere den boso. Boso ta nos futuro. Y nos ta compromete pa crea e condicion y sosten necesario pa boso por regresa Aruba y ta exitoso”, Minister Croes a enfatisa.
Durante e bishita, Minister Croes tambe a cumpli cu su ronda di introduccion oficial y a dialoga cu e miembronan di ‘Studenten Commissie Aruba’ cu recientemente a wordo instala, un grupo clave den representacion y sosten di studiantenan Arubiano na Hulanda.
Un punto sobresaliente tabata e entrega oficial di e ‘Studenten Succesbeleid 2025–2030’, un documento strategico pa guia y promove e bienestar y exito di studiantenan Arubiano den Reino Hulandes. E documento a wordo presenta na Minister Croes pa Directora di Gabinete di Aruba na Hulanda, Sra. Joselin Croes, como simbolo di cooperacion y direccion strategico pa e añanan binidero.
E encuentro a confirma cu Aruba tin un generacion di hoben inspira y comprometi, y cu hunto cu – gobierno, institucionnan y e studiantenan mes – nos por sigui traha pa un futuro cu speransa, igualdad y progreso.
Danki pa boso energia, boso speransa, boso participacion y boso compromiso. Aruba ta conta riba boso.
