Minister di Relacionnan den Reino, Educacion, Hubentud, Innovacion y Deporte, mr. Gerlien Croes, a firma un acuerdo importante cu New Paltz State University of New York, habriendo un porta nobo y creando asina oportunidad educativo pa hobennan y maestronan Arubiano cu aspiracion pa sigui nan estudio y/of profesionalisacion na Merca, specificamente den e estado di New York.
E acuerdo ta contempla cooperacion den diferente area di estudio clave pa e desaroyo di e futuro di Aruba, incluyendo arte visual y escenico, tecnologia aplica, formacion pa maestro, STEM, sostenibilidad, investigacion, negoshi y mas. E alianza strategico aki ta parti di e compromiso di Gabinete AVP-FUTURO pa amplia acceso na educacion superior relevante y prepara nos hubentud pa enfrenta e demanda di un mercado laboral globalisa.
Durante e firmamento, Minister Gerlien Croes a expresa su gratitud pa e cooperacion y acuerdo cu SUNY New Paltz University y a subraya e importancia di colaboracion internacional pa empodera nos hobennan y fortalece nos infrastructura educativo.
“Nos ta traha pa un Aruba cu mas oportunidad. Aki ta un paso concreto pa amplia horizonte di nos hubentud y conecta nan directamente cu institucionnan cu por nutri nan talento y ambicion”, Minister Gerlien Croes a subraya.
E acuerdo cu New Paltz University ta un di e varios pasonan strategico cu Ministerio di Educacion ta y lo tuma pa yega na un red di cooperacion cu institucionnan internacional na beneficio di nos studiantenan y maestronan y pa construi un Aruba mas fuerte den conocemento, creatividad y sostenibilidad.
